തമിഴ്ജനതയുടെ തലൈവിയായി നയൻ‌താര?!
ജയലളിതയുടെ ജീവിതം സിനിമയാകുന്നു, ‘അമ്മ’യായി നയൻ‌താര?
അന്തരിച്ച മുൻ‌തമിഴ് മുഖ്യമന്ത്രി ജയലളിതയുടെ ജീവിതം സിനിമയാകുന്നു. ജയലളിത ജീവിച്ചിരുന്നപ്പോള്‍ തന്നെ നിരവധി തവണ അവരുടെ ജീവിതം സിനിമയാക്കുന്നെന്ന പ്രചരണങ്ങള്‍ വന്നിരുന്നു. മരണ ശേഷം ഇത്തരം അഭ്യൂഹങ്ങള്‍ ശക്തമായി.
ഒടുവില്‍ അമ്മയുടെ ജീവിതം സിനിമയാക്കുന്നുവെന്ന് സ്ഥിരീകരണം ആയിരിക്കുകയാണ്. സംവിധായകന്‍ എഎല്‍ വിജയ് ആണ് ജയലളിതയെ തിരശ്ശീലയില്‍ എത്തിക്കുന്നത്. പ്രശസ്ത നിര്‍മ്മാണ കമ്പനിയായ വിബ്രി മീഡിയയാണ് ചിത്രം നിര്‍മ്മിക്കുന്നത്.
തമിഴ്നാട്ടിലെ മാത്രമായിരുന്നില്ല, ഇന്ത്യയിലെ തന്നെ ഏറ്റവും ശക്തരായ ഭരണാധികാരികളിലൊരാളായിരുന്നു ജയലളിത. ഈ ലോകത്തുള്ള ഏതൊരു സ്ത്രീക്കും അവരുടെ ജീവിതം പ്രചോദനമാണ്. അവരുടെ ജന്മവാര്‍ഷികത്തിന്റെ അന്നു തന്നെ ഫസ്റ്റ്‌ലുക്ക് പുറത്തിറങ്ങും' വിബ്രി മീഡിയ ഡയറക്ടര്‍ ബിന്ദ്ര പ്രസാദ് പറഞ്ഞു. ഫെബ്രുവരി 24നാണ് ജയയുടെ പിറന്നാള്‍.
അതേസമയം, ജയലളിതയായി ആരെത്തും എന്ന ആകാംഷയിലാണ് ആരാധകര്‍. നയൻ‌താരയെ ആയിരിക്കും സം‌വിധായകൻ തിരഞ്ഞെടുത്തിട്ടുണ്ടാവുക എന്നാണ് സൂചനകൾ.
