ടോവിനോ-സൗബിന്‍ ടീമിന്റെ നടികര്‍ റിലീസിന് ഒരുങ്ങുകയാണ്. ലാല്‍ ജൂനിയര്‍ സംവിധാനം ചെയ്ത സിനിമയുടെ പ്രമോഷന്‍ തിരക്കിലാണ് ഇരു താരങ്ങളും. സിനിമയില്‍ മാത്രമല്ല യഥാര്‍ത്ഥ ജീവിതത്തിലും ഫാഷനബിളായ കോസ്റ്റ്യൂമുകള്‍ തെരഞ്ഞെടുക്കാറുണ്ട് സൗബിന്‍. ഇത്രയ്ക്കും ആകര്‍ഷണീയമായ കോസ്റ്റ്യൂമുകള്‍ക്ക് പിന്നില്‍ ആരാണെന്ന ചോദ്യം നടനു മുന്നില്‍ പലപ്പോഴായി എത്തിയിട്ടുണ്ട്.
ഇപ്പോഴിതാ ആരാണ് കോസ്റ്റ്യൂമുകള്‍ സെലക്ട് ചെയ്യുന്നത് എന്ന ചോദ്യത്തിന് മറുപടി നല്‍കിയിരിക്കുകയാണ് നടന്‍ സൗബിന്‍.
'ഞാന്‍ അസിസ്റ്റന്റ് ഡയറക്ടര്‍ ആകുന്നതിനുമുമ്പ് അസിസ്റ്റ് ചെയ്യുന്ന സമയത്തൊക്കെ സെയില്‍സിലാണ് വര്‍ക്ക് ചെയ്തത്. സെയില്‍സ്മാന്‍ ആയിരുന്നു ഞാന്‍. പിന്നെ സ്വന്തമായി എനിക്ക് ഡ്രസ്സിന്റെ ഒരു ഷോപ്പ് ഉണ്ടായിരുന്നു. മുംബൈയിലും തായ്ലാന്‍ഡിലും ഒക്കെ പോയി അവിടേക്ക് ഡ്രസ്സ് വാങ്ങി വരുമായിരുന്നു.
അങ്ങനെയുള്ള കടകളും മറ്റും ഉണ്ടായിരുന്നു. പിന്നെ അസിസ്റ്റന്റ് ഡയറക്ടറായി കയറി. അസോസിയേറ്റ് ആയി കഴിഞ്ഞപ്പോഴാണ് ഇതൊക്കെ വിടുന്നത്. കാരണം അത് കുറച്ചുകൂടെ വലിയ ഒരു പണിയായിരുന്നു .വീട്ടിലെ പട്ടിണി കാണിച്ചില്ലെങ്കിലും നല്ല ഡ്രസ്സ് ഇട്ടിട്ട് മാത്രമേ ഞാന്‍ പുറത്ത് നടക്കുകയുള്ളൂ',- സൗബിന്‍ പറഞ്ഞു.
