പുലര്‍ച്ചെ കാമുകിയെ കാണാൻ പോയ ടെക്കിയെ തല്ലിക്കൊന്നു; യുവാവിനെക്കുറിച്ച് അറിയില്ലെന്ന് യുവതി
പുലര്‍ച്ചെ കാമുകിയെ കാണാൻ പോയ ടെക്കിയെ തല്ലിക്കൊന്നു
കാമുകിയെ കാണാൻ പോയ യുവാവ് കൊല്ലപ്പെട്ട നിലയില്‍. ബംഗളൂരുവിലെ അക്സഞ്ചർ കമ്പനി ഉദ്യോഗസ്ഥനും ഭുവനേശ്വർ സ്വദേശിയുമായ പ്രണവ് മിശ്ര (28)യെയാണ് അജ്ഞാതർ തല്ലിക്കൊന്നത്. സംഭവത്തില്‍ പൊലീസ് അന്വേഷണം ഊര്‍ജ്ജിതമാക്കി.
സംഭവത്തെക്കുറിച്ച് പൊലീസ് പറയുന്നതിങ്ങനെ
സുഹൃത്തായ ബൽബീറിന്റെ വീട്ടിലെ നിശാപാർട്ടി കഴിഞ്ഞ് താമസസ്ഥലത്ത് എത്തിയ പ്രണവ് പുലർച്ചെ 2.45ന് കാമുകിയുമായി ഫോണില്‍ സംസാരിച്ചു. താന്‍ ഉടന്‍ കാണാന്‍ എത്തുമെന്നും കാത്തിരിക്കണമെന്നും യുവതിയോട് പറയുകയും ചെയ്‌തു.
ഹോണ്ട ആക്‍ടീവയില്‍ യാത്ര തിരിച്ച പ്രണവിനെ സൗത്ത് ബംഗളൂരുവിലെ ചോക്ളേറ്റ് ഫാക്ടറിക്ക് സമീപത്ത് വച്ച് ബൈക്കിലെത്തിയ രണ്ട് പേർ ചേർന്ന് മര്‍ദ്ദിച്ചു. ഗുരുതരമായി പരുക്കേറ്റ യുവാവിനെ സമീപവാസികള്‍ ആശുപത്രിയില്‍ എത്തിച്ചെങ്കിലും മരിക്കുകയായിരുന്നു.
കൊലപാതകത്തിന് പിന്നില്‍ മോഷണ ശ്രമമല്ലെന്ന് പൊലീസ് വ്യക്തമാക്കി. പ്രണവിന്റെ ഫോണും പേഴ്‌സുമടക്കമുള്ള വിലപിടിപ്പുള്ള വസ്‌തുക്കള്‍ സംഭവസ്ഥലത്തു തന്നെ ഉണ്ടായിരുന്നുവെന്നും പൊലീസ് പറഞ്ഞു.
അതേസമയം, പ്രണവിനെക്കുറിച്ച് കൂടുതലൊന്നും അറിയില്ലെന്ന് കാമുകിയായ പെണ്‍കുട്ടി പൊലീസിന് മൊഴി നല്‍കി. യുവതിയുടെ മൊഴി വിശ്വസിക്കുന്നില്ലെന്നും അന്വേഷണം വ്യാപിപ്പിക്കുമെന്നും കുറ്റവാളികൾ ഉടൻ പിടിയിലാകുമെന്നും ഡെപ്യൂട്ടി കമ്മീഷ്ണർ എംബി ബൊരലിംഗയ്യ വ്യക്തമാക്കി.
