Select Your Language

Notifications

webdunia
webdunia
webdunia
webdunia

വരൂ... സഞ്ചാരികളുടെ പറുദീസയായ സാമൂതിരിമാരുടെ നാട്ടിലൂടെ ഒരു യാത്ര പോകാം !

കോഴിക്കോട്ടെ പ്രധാന വിനോദ സഞ്ചാര കേന്ദ്രങ്ങള്‍

വരൂ... സഞ്ചാരികളുടെ പറുദീസയായ സാമൂതിരിമാരുടെ നാട്ടിലൂടെ ഒരു യാത്ര പോകാം !
, ബുധന്‍, 22 ഫെബ്രുവരി 2017 (14:34 IST)
കേരളത്തിന്റെ വടക്കുവശത്തുള്ള ഒരു ജില്ലയാണ് കോഴിക്കോട്‌‌. ബ്രിട്ടീഷ്‌ ഭരണ കാലത്ത്‌ മദ്രാസ് സംസ്ഥാനത്തിന്റെ ഭാഗമായിരുന്ന മലബാർ ജില്ലയുടെ തലസ്ഥാനമായിരുന്നു ഇത്. വടക്ക്‌ ഭാഗത്തായി കണ്ണൂർ ജില്ല, തെക്ക്‌ മലപ്പുറം, കിഴക്ക്‌ ഭാഗത്ത് വയനാട് ജില്ല, പടിഞ്ഞാറ്‌ അറബിക്കടൽ എന്നിവയാണ്‌ കോഴിക്കോടിന്റെ അതിർത്തികൾ. കേരളത്തിലെ മഹാനഗരങ്ങളിൽ ഒന്നായ കോഴിക്കോട്‌ നഗരമാണ്‌ ഈ ജില്ലയുടെ ആസ്ഥാനം. സഞ്ചാരികളെ ആകര്‍ഷിക്കുന്ന നിരവധി വിനോദ സഞ്ചാരകേന്ദ്രങ്ങള്‍ ഈ ജില്ലയിലുണ്ട്. ഏതെല്ലാമാണ് അവയെന്ന് നോക്കാം.
 
കക്കയം ഡാം:
 
കോഴിക്കോട് നഗരത്തില്‍ നിന്നും ഏകദേശം 63 കിലോമീറ്റര്‍ അകലെയാണ്‌ കക്കയം ഡാം. കക്കയം ഡാമില്‍ നിന്നും വൈദ്യുതി ഉത്പാദിപ്പിച്ച ശേഷമുള്ള വെള്ളം പെരുവണ്ണാമുഴി ഡാമില്‍ സംഭരിച്ചാണ് ജലസേചനത്തിനായി ഉപയോഗിക്കുന്നത്. ട്രക്കിങ് ഏറെ ഇഷ്ടപ്പെടുന്നവര്‍ക്ക് വളരെ ആകര്‍ഷകമായ ഒരു വിനോദസഞ്ചാര പ്രദേശം കൂടിയാണിത്. 
 
തുഷാരഗിരി വെള്ളച്ചാട്ടം: 
 
കോഴിക്കോട് ജില്ലയിലെ കോടഞ്ചേരി എന്ന സ്ഥലത്താണ് തുഷാരഗിരി വെള്ളച്ചാട്ടം. മഞ്ഞണിഞ്ഞ മലകള്‍ എന്ന് 
അര്‍ത്ഥം വരുന്ന തുഷാരഗിരി പശ്ചിമഘട്ടത്തിന്റെ താഴ്വരയിലാണ് സ്ഥിതിചെയ്യുന്നത്. പ്രകൃതി രമണീയമായ ഒരു വെള്ളച്ചാട്ടമാണിത്. വെള്ളച്ചാട്ടത്തിന് ഏറ്റവും ശക്തിയുള്ള കാലയളവായ സെപ്റ്റംബര്‍ മുതല്‍ നവംബര്‍ വരെയുള്ള മാസങ്ങളാണ് തുഷാരഗിരി സന്ദര്‍ശിക്കാന്‍ ഏറ്റവും അനുയോജ്യം. ജാതിക്ക, റബ്ബര്‍, കുരുമുളക്, ഇഞ്ചി തുടങ്ങിയ പല സുഗന്ധവ്യഞ്ജനങ്ങളുടെ കൃഷിസ്ഥലമായ ഇവിടം സാഹസിക വിനോദസഞ്ചാരികള്‍ക്ക് ഏറെ പ്രിയങ്കരമാണ്. 
 
മാനാഞ്ചിറ:
 
കോഴിക്കോട്ടുകാരുടെ സ്വകാര്യ അഹങ്കാരമാണ് മാനാഞ്ചിറ മൈതാനം. കോഴിക്കോട് നഗരത്തിന്റെ മധ്യത്തിലാണ് ഇത് സ്ഥിതിചെയ്യുന്നത്. കോഴിക്കോടിന്റെ ഫുട്ബോള്‍ സംസ്കാരവുമായി വളരെയടുത്ത ബന്ധമുള്ള ഒരു മൈതാനമായിരുന്നു മനാഞ്ചിറ മൈതാനം. നിരവധി ദേശീയ അന്തര്‍ ദേശീയ ഫുട്ബോള്‍മല്‍സരങ്ങള്‍ക്ക് ഇവിടം വേദിയായിട്ടുണ്ട്.
 
ബേപ്പൂര്‍ തുറമുഖം: 
 
കേരളത്തിലെ പുരാതനമായ തുറമുഖങ്ങളില്‍ ഒന്നാണ് ബേപ്പൂര്‍ തുറമുഖം. തടി കൊണ്ടുളള കപ്പലുകള്‍  ഉണ്ടാക്കുന്നതിന് പ്രശസ്തമായ ഇടമയിരുന്നു ബേപ്പൂര്‍. ഇന്ന് ചില ഉരുക്കള്‍ വിനോദസഞ്ചാര നൌകകളായി ഉപയോഗിക്കുന്നു. രണ്ടു കിലോ മീറ്ററോളം കടലിനുള്ളിലേക്ക് തള്ളി നില്കുന്ന പാത ഇവിടെയുണ്ട്. ഒരു നല്ല വിനോദ സഞ്ചാര കേന്ദ്രം കൂടിയാണ് ബേപ്പൂര്‍.
 
കോഴിക്കോട് ബീച്ച്:
 
നൂറു വര്‍ഷത്തിലേറെ പഴക്കമുള്ള തകര്‍ന്ന രണ്ട് കടല്‍പ്പാലങ്ങളാണ് ഈ ബീച്ചിലെ പ്രധാന ആകര്‍ഷണം. നഗരത്തിന് വളരെയടുത്തായാണ് ഈ ബീച്ച് സ്ഥിതി ചെയ്യുന്നത്. കന്യാകുമാരിയെ ഓര്‍മിപ്പിക്കുന്ന തരത്തിലുള്ള സൂര്യാസ്തമനം കാണുന്നതിന് പ്രശസ്തമായ ഇടമാണിത്.
 
പഴശ്ശിരാജാ മ്യൂസിയം:
 
ഈസ്റ്റ് ഹില്ലിനടുത്താണ് ഈ മ്യൂസിയം സ്ഥിതി ചെയ്യുന്നത്. സംസ്ഥാന പുരാവസ്തു വകുപ്പാണ് ഈ മ്യൂസിയം ഇപ്പോള്‍ നോക്കി നടത്തുന്നത്. ചെമ്പ് പാത്രങ്ങളും പഴയകാല ചുവര്‍ച്ചിത്രങ്ങളും പഴയ നാണയങ്ങളും അമ്പലങ്ങളുടെ മാതൃകകളും മറ്റ് കൗതുകരങ്ങളായ പലതും ഇവിടെ കാണാന്‍ സാധിക്കും.
 
കാപ്പാട്:
 
1498ല്‍ വാസ്കോ ഡാ ഗാമ വന്നിറങ്ങിയ തുറമുഖമാണ് കാപ്പാട്. ഒരു ചരിത്രത്തിന്റെ ഭാഗമാണ് ഈ തുറമുഖം. ഇതിനെ അനുസ്മരിക്കാനായി ചെറിയൊരു കല്‍മണ്ഡപവും ഇവിടെ പണിതുയര്‍ത്തിയിട്ടുണ്ട്.
 
ഡോള്‍ഫിന്‍ പോയിന്റ്:
 
പ്രഭാത സമയത്ത് കടലില്‍ കളിക്കുന്ന ഡോള്‍ഫിനുകളെ ഇവിടെ കാണാന്‍ സാധിക്കും. കോഴിക്കോട് നഗരത്തില്‍ നിന്ന് രണ്ട് കിലോ മീറ്റര്‍ മാത്രം അകലമുള്ള ഈ കടല്‍ത്തീരത്തം സന്ദര്‍ശകര്‍ക്ക് ഏറെ പ്രിയങ്കരമാണ്.
 
ആര്‍ട്ട് ഗ്യാലറി:
 
പഴശ്ശിരാജാ മ്യൂസിയത്തിനടുത്തായാണ് ആര്‍ട്ട് ഗ്യാലറി സ്ഥിതി ചെയ്യുന്നത്. രാജാ രവി വര്‍മ്മ ചിത്രങ്ങളുടെ ഒരു മഹനീയ ശേഖരമാണ് ഇവിടെയുള്ളത്.
 
കടലുണ്ടി പക്ഷി സങ്കേതം:
 
പ്രകൃതി സ്നേഹികളുടെ പറുദീസയാണ് കടലുണ്ടി പക്ഷി സങ്കേതം. നവംബര്‍ മാസത്തില്‍ വന്ന് ഏപ്രില്‍ അവസാനം തിരിച്ചു പോകുന്ന ധാരാളം ദേശാടനപക്ഷികളെ ഇവിടെ കാണാന്‍ സാധിക്കും. ഡിസംബര്‍ മുതല്‍ ഏപ്രില്‍ മാസം വരെയുള്ള പ്രഭാതങ്ങളിലാണ് ഇവിടെ സന്ദര്‍ശനത്തിന് അനുയോജ്യമായ സമയം. 

Share this Story:

Follow Webdunia malayalam

അടുത്ത ലേഖനം

ഇന്ത്യൻ സിനിമയിൽ മാത്രമല്ല, ലോക സിനിമയിലും ആ റെക്കോർ‌ഡ് മമ്മൂട്ടിയ്ക്ക് മാത്രം!