91 ശതമാനം ഫലപ്രദം, ഡെങ്കിക്കെതിരെ ലോകത്തിലെ ആദ്യ സിംഗിൾ ഡോസ് വാക്സിൻ, അംഗീകാരം നൽകി ബ്രസീൽ

ഡെങ്കിപ്പനിക്കെതിരെ ലോകത്തിലെ ആദ്യത്തെ സിങ്കിള്‍ ഡോസ് വാക്‌സിന് അംഗീകാരം നല്‍കി ബ്രസീല്‍. ആഗോളതാപനത്തിന്റെ ഫലമായി ലോകമെങ്ങും താപനില വര്‍ധിക്കുകയും സാംക്രമിക രോഗങ്ങളായ ഡെങ്കി അടക്കമുള്ളവ പടരുകയും ചെയ്യുന്ന സാഹചര്യത്തിലാണ് ആശ്വാസവാര്‍ത്ത. സാവോപോളോയിലെ Butuntan Institute വികസിപ്പിച്ച Butundan -DV വാക്‌സിനാണ് അധികൃതര്‍ അംഗീകാരം നല്‍കിയിരിക്കുന്നത്.

 12 മുതല്‍ 59 വയസ്സുവരെ പ്രായമായവര്‍ക്ക് വാക്‌സിന്‍ ഉപയോഗിക്കാം. 8 വര്‍ഷത്തെ ക്ലിനിക്കല്‍ പരീക്ഷണങ്ങള്‍ക്ക് ശേഷമാണ് Butundan -DV വാക്‌സിന്‍ വികസിപ്പിച്ചതെന്നാണ് റിപ്പോര്‍ട്ടുകള്‍. ആറായിരത്തിലധികം സന്നദ്ധപ്രവര്‍ത്തകരില്‍ നടത്തിയ പരീക്ഷണത്തില്‍ വാക്‌സിന്‍ 91.6 ശതമാനം ഫലപ്രദമാണെന്നാണ് കണ്ടെത്തിയിട്ടുള്ളത്. വാക്‌സിന്റെ വരവോടെ പതിറ്റാണ്ടുകളായി ആളുകളെ ബാധിക്കുന്ന ഡെങ്കിയെ തടയാനാകുമെന്നാണ് കരുതുന്നത്. 2024ലെ കണക്ക് പ്രകാരം ആഗോളതലത്തില്‍ 1.46 കോടിയിലധികം ഡെങ്കി കേസുകളാണ് റിപ്പോര്‍ട്ട് ചെയ്തിട്ടുള്ളത്. ഈ കാലയളവില്‍ 12,000 മരണങ്ങളും ഡെങ്കി മൂലം റിപ്പോര്‍ട്ട് ചെയ്തിരുന്നു.