ഗ്രേറ്റ്ഫാദറിലെ വാപ്പച്ചിയുടെ ഫൈറ്റ് കണ്ട് നെഞ്ചിടിപ്പുകൂടിപ്പോയി: ദുല്‍ക്കര്‍

ദി ഗ്രേറ്റ്ഫാദര്‍ എന്ന സ്റ്റൈലിഷ് ത്രില്ലര്‍ കണ്ടവരാരും അതിന്‍റെ ക്ലൈമാക്സ് ഫൈറ്റ് മറന്നിട്ടുണ്ടാവില്ല. മമ്മൂട്ടി എന്ന താരത്തിന്‍റെ അത്യുജ്ജ്വല ആക്ഷന്‍ പ്രകടനമാണ് ആ ചിത്രത്തില്‍ കാണാന്‍ കഴിഞ്ഞത്. ജാക്കിച്ചാന്‍ ചിത്രങ്ങളില്‍ കാണുന്ന പ്രത്യേകതരം ആക്ഷന്‍ മൂവ്‌മെന്‍റ്സ് ഗ്രേറ്റ്ഫാദറിലെ ക്ലൈമാക്സ് ഫൈറ്റില്‍ മമ്മൂട്ടി പരീക്ഷിച്ചു.

ആ ആക്ഷന്‍ രംഗം കണ്ട് തന്‍റെ നെഞ്ചിടിപ്പുകൂടിപ്പോയതായി യുവസൂപ്പര്‍താരം ദുല്‍ക്കര്‍ സല്‍മാന്‍ പറയുന്നു. “വാപ്പച്ചി ഇടയ്ക്ക് പറയും, ‘ഫൈറ്റിലൊന്നും നീ റിസ്ക് എടുക്കരുത്, സൂക്ഷിച്ചേ ചെയ്യാവൂ.’ അതേ ആളാണ് ഗ്രേറ്റ്ഫാദറില്‍ ആ ഫൈറ്റ് ചെയ്തത്. അതുകണ്ട് എന്‍റെ നെഞ്ചിടിപ്പ് കൂടിപ്പോയി. എല്ലാം സ്വയം ചെയ്യാന്‍ ഇഷ്ടമാണ്. നമ്മള്‍ ചെയ്താല്‍ പക്കാ അച്ഛനാകും. ഇതൊക്കെ ഞാന്‍ ആസ്വദിക്കാറുണ്ട്” - വനിതയ്ക്ക് അനുവദിച്ച അഭിമുഖത്തില്‍ ദുല്‍ക്കര്‍ സല്‍മാന്‍ പറയുന്നു.

“മമ്മൂട്ടി എന്ന നടനും വാപ്പച്ചിയും - രണ്ടും രണ്ട് വ്യക്തികളാണ്. വാപ്പച്ചി സിനിമയ്ക്കായി കഥ കേള്‍ക്കുമ്പോള്‍ കാണിക്കുന്ന ആകാം‌ക്ഷയും ആവേശവും എന്നേക്കാള്‍ കൂടുതലാണ്. അതുണ്ടാക്കുന്ന പ്രോത്സാഹനവും വലുതാണ്. ഞങ്ങളൊക്കെ എപ്പോഴും അടുത്തുണ്ടാകാന്‍ വാപ്പച്ചിക്ക് വലിയ ആഗ്രഹമാണ്. ചിലപ്പോള്‍ ഷൂട്ട് കഴിഞ്ഞുവരാന്‍ ലേറ്റായാല്‍ ചോദിക്കും - നീ എന്താ ഇത്രയും വൈകിയത്? നേരത്തേ ഷൂട്ട് തീര്‍ക്കാന്‍ പറഞ്ഞൂടായിരുന്നോ?” - ദുല്‍ക്കര്‍ വെളിപ്പെടുത്തുന്നു.