മമ്മൂട്ടിയുടെ അത്രയും പ്രായമില്ല, പക്ഷേ മമ്മൂട്ടിയെപ്പോലെയാണ് അക്ഷയ്കുമാര്‍ !

അക്ഷയ്കുമാറിന് ഇന്ന് 49

മലയാളത്തിന്‍റെ മഹാനടന്‍ മമ്മൂട്ടിയുടെ ജന്‍‌മദിനം മലയാളികള്‍ ആഘോഷിച്ചത് കഴിഞ്ഞ ദിവസമാണ്. ഇന്ന് ബോളിവുഡ് സൂപ്പര്‍താരം അക്ഷയ് കുമാറിന്‍റെ ജന്‍‌മദിനമാണ്. അക്ഷയുടെ നാല്‍പ്പത്തൊമ്പതാം ജന്‍‌മദിനമാണ് ഇന്ന് ആഘോഷിക്കുന്നത്. മമ്മൂട്ടിയുടെ അത്ര പ്രായമില്ലെങ്കിലും ജീവിതത്തില്‍ മൂല്യങ്ങള്‍ സൂക്ഷിക്കുന്ന കാര്യത്തില്‍ മമ്മൂട്ടിയുടെ പാത തന്നെയാണ് അക്ഷയ്കുമാറും പിന്തുടരുന്നത്.

അക്ഷയ്കുമാറിന്‍റെ ചില ജീവിതവിശേഷങ്ങള്‍:

അക്ഷയ് കുമാര്‍ ആദ്യം ട്വിങ്കിളിനെ കാണുന്നത് ഒരു മാഗസിന്‍റെ ഫോട്ടോ ഷൂട്ട് വേളയിലാണ്. ആ ഫോട്ടോ അക്ഷയ് കുമാറിന്‍റെ കൈവശം ഇന്നും ഭദ്രം.

എല്ലാ ശനിയാഴ്ചയും ഒരുമിച്ച് ഡിന്നര്‍ കഴിക്കാനായി അക്ഷയും ട്വിങ്കിളും പുറത്തുപോകാറുണ്ട്. ഗജാലി എന്ന സീഫുഡ് റെസ്റ്റോറന്‍റിലാണ് പലപ്പോഴും പോകാറുള്ളത്. അവര്‍ കഴിച്ചതിന് ഒരിക്കലും 600 രൂപയ്ക്ക് മേല്‍ ബില്‍ വരാറില്ല. തന്‍റെ ഒരുമാസത്തെ വ്യക്തിപരമായ ചെലവുകള്‍ 5000 രൂപയില്‍ അധികരിക്കാറില്ലെന്ന് അക്ഷയ് ഒരിക്കല്‍ പറഞ്ഞിട്ടുണ്ട്!

ആറടി ഒരിഞ്ച് നീളക്കാരനാണ് അക്ഷയ് കുമാര്‍. തികഞ്ഞ കായികാഭ്യാസി. തായ് ഫുഡും ജാപ്പനീസ് ഭക്ഷണവുമാണ് അക്ഷയിന് ഏറ്റവുമിഷ്ടം. രാത്രി ഏഴുമണിക്ക് ശേഷം അക്ഷയ് ഒരു ആഹാരവും കഴിക്കാറില്ല.

ആദ്യം സ്വന്തമാക്കിയതിനോടൊക്കെ അക്ഷയ് കുമാറിന് വലിയ പ്രേമമുണ്ട്. ആദ്യം വാങ്ങിയ ബൈക്കും കാറും വീടുമൊക്കെ അക്ഷയ് ആര്‍ക്കും കൈമാറിയിട്ടില്ല. ചാന്ദ്‌നി ചൌക്കിലെ ഒറ്റമുറി ഫ്ലാറ്റില്‍ ആരുമറിയാതെ ഇപ്പോഴും അക്ഷയ് സന്ദര്‍ശനം നടത്താറുണ്ട്.

പുലര്‍ച്ചെ അഞ്ചുമണിക്കുതന്നെ അക്ഷയ്കുമാര്‍ ഉണരും. ഒരിക്കലും അതില്‍ മാറ്റം വരുത്തിയിട്ടില്ല. കാലത്ത് ആറുമണിക്കാണ് അദ്ദേഹം മാധ്യമങ്ങള്‍ക്ക് അഭിമുഖം അനുവദിക്കാറുള്ളത്.

‘ഖിലാഡി’ എന്ന് പേരില്‍ ഉള്‍പ്പെടുത്തിയ എട്ട് സിനിമകളില്‍ അക്ഷയ്കുമാര്‍ അഭിനയിച്ചിട്ടുണ്ട്. ലോകസിനിമയില്‍ തന്നെ ഏറ്റവുമധികം വരുമാനമുള്ള നടനാണ് അക്ഷയ്കുമാര്‍.

തന്‍റെ ബ്ലാക്ക് ഹോണ്ട സി ആര്‍ വി സ്വയം ഡ്രൈവ് ചെയ്യുന്നത് അക്ഷയ് കുമാറിന് വളരെ ഇഷ്ടമുള്ള കാര്യമാണ്. ഷൂസുകള്‍ വാങ്ങുന്നതിലാണ് അക്ഷയ്ക്ക് ഏറെ കമ്പമുള്ളത്. അക്ഷയിന് പ്രിയപ്പെട്ട പെര്‍ഫ്യൂം ഡേവിഡോഫിന്‍റെ കൂള്‍ വാട്ടറാണ്. ലൈഫ് ഈസ് ബ്യൂട്ടിഫുള്‍ എന്ന ഹോളിവുഡ് സിനിമയാണ് അക്ഷയ് ഏറ്റവും ഇഷ്ടപ്പെടുന്ന ചിത്രം. ശ്രീദേവിയാണ് അക്ഷയ്ക്ക് ഏറ്റവും ഇഷ്ടമുള്ള നടി.

ടാറ്റൂ ഭ്രമക്കാരായ ബോളിവുഡ് താരങ്ങള്‍ക്കിടയില്‍ അക്ഷയ്കുമാര്‍ വ്യത്യസ്തനാണ്. ഭാര്യയുടെയും മകന്‍റെയും പേരാണ് അക്ഷയ് തന്‍റെ ശരീരത്തില്‍ ടാറ്റൂ പതിച്ചിട്ടുള്ളത്.