4.2 മില്യൺ കാഴ്ചക്കാര്‍, ഇപ്പോഴും യൂട്യൂബ് ട്രെൻഡിങ്ങിൽ മുന്നിൽ തന്നെ, 'ദേവദൂതർ പാടി' വീഡിയോ സോങ് ഒരിക്കൽ കൂടി കാണാം

ചാക്കോച്ചന്റെ അംബാസ് രാജീവൻ ആടിത്തിമിർക്കുന്നത് സോഷ്യൽ മീഡിയ ഏറ്റെടുത്തുകഴിഞ്ഞു. സിനിമ താരങ്ങൾ ഉൾപ്പെടെയുള്ളവർ 'ന്നാ താൻ കേസ് കൊട്' (Nna Thaan Case Kodu) എന്ന സിനിമയിലെ 'ദേവദൂതർ പാടി' ഗാനവും കുഞ്ചാക്കോ ബോബന്റെ ഡാൻസും പങ്കുവെച്ചു കൊണ്ടേയിരുന്നു.37 വർഷങ്ങൾക്ക് മുൻപ് ഔസേപ്പച്ചൻ ഈണമിട്ട 'ദേവദൂതർ പാടി' എന്ന ഗാനം വീണ്ടും ഈ ചിത്രത്തിലൂടെ കേൾക്കാനായ സന്തോഷത്തിലാണ് സിനിമാസ്വാദകർ. ഇപ്പോഴും യൂട്യൂബ് ട്രെൻഡിങ്ങിൽ മുന്നിൽ തന്നെയാണ് പാട്ട്. ഇതിനകം തന്നെ 4.2 മില്യൺ കാഴ്ചക്കാര്‍ യൂട്യൂബിലൂടെ മാത്രം വീഡിയോ സോങ്ങ് കണ്ടുകഴിഞ്ഞു. യൂട്യൂബ് ട്രെൻഡിങ്ങിൽ നിലവിൽ എട്ടാം സ്ഥാനത്താണ് ഉള്ളത്.

കുഞ്ചാക്കോ ബോബനെ നായകനാക്കി രതീഷ് പൊതുവാൾ തിരക്കഥയെഴുതി സംവിധാനം ചെയ്യുന്ന 'ന്നാ താൻ കേസ് കൊട്' വൈകാതെ തന്നെ പ്രദർശനത്തിന് എത്തും.ആൻഡ്രോയിഡ് കുഞ്ഞപ്പൻ,കനകം കാമിനി കലഹം തുടങ്ങിയ ചിത്രങ്ങൾക്കു ശേഷമാണ് രതീഷ് പൊതുവാൾ മൂന്നാമത്തെ സിനിമയുമായി എത്തുന്നത്.