മമ്മൂട്ടി - ഹരിഹരന്‍ ചിത്രം വരുന്നു, മെഗാസ്റ്റാര്‍ 5 മാസത്തെ ഡേറ്റ് നല്‍കി ?

മമ്മൂട്ടിയും ഹരിഹരനും വീണ്ടും ഒന്നിക്കുന്നു. ബിഗ് ബജറ്റില്‍ ഒരുങ്ങുന്ന ഈ സിനിമയ്ക്ക് അഞ്ച് മാസത്തെ ചിത്രീകരണമാണുള്ളത്. പ്രൊജക്ട് എന്ന് ആരംഭിക്കണം എന്നതില്‍ ചര്‍ച്ച തുടരുകയാണ്.

സിനിമയുമായി ബന്ധപ്പെട്ട പ്രാഥമികഘട്ട ചര്‍ച്ചകള്‍ പൂര്‍ത്തിയായിക്കഴിഞ്ഞു. ആരുടെ തിരക്കഥയിലാണ് ഹരിഹരന്‍ ചിത്രമൊരുക്കുന്നത് എന്ന് വ്യക്തമായിട്ടില്ല. ഹരിഹരന്‍ തന്നെയായിരിക്കും തിരക്കഥയെഴുതുന്നത് എന്നാണ് ലഭിക്കുന്ന സൂചനകള്‍.

മമ്മൂട്ടി ഇപ്പോള്‍ എട്ട് സിനിമകള്‍ക്ക് ഡേറ്റ് നല്‍കിയിട്ടുണ്ട്. മമ്മൂട്ടിയുടെ തിരക്ക് അല്‍പ്പം കുറയുമ്പോള്‍ തുടര്‍ച്ചയായി ഡേറ്റ് ഉപയോഗിച്ച് മൂന്നോ നാലോ ഷെഡ്യൂളുകളായി ചിത്രീകരിക്കാനാണ് തീരുമാനം എന്നറിയുന്നു.

എം ടിയുടെ തിരക്കഥയില്‍ ഒരു സിനിമ ചെയ്യാമെന്നാണ് ഹരിഹരന്‍ ആലോചിച്ചിരുന്നത്. എന്നാല്‍ മഹാഭാരതവുമായി ബന്ധപ്പെട്ട് എം ടി തിരക്കിലാണെന്നാണ് വിവരം. എന്തായാലും സാമൂഹ്യപ്രതിബദ്ധതയുള്ള ഒരു സിനിമ ചെയ്യാനാണ് ഹരിഹരനും മമ്മൂട്ടിയും ആലോചിക്കുന്നത്.