തീപാറും! ഇന്ത്യ മുഴുവന്‍ ഓളമുണ്ടാക്കാന്‍ ഖുറേഷി എബ്രഹാം, എത്തുന്നത് 5 ഭാഷകളില്‍, റിലീസ് 2024 ല്‍ തന്നെ

കാത്തിരിപ്പ് അവസാനിച്ചു. പൃഥ്വിരാജ് സംവിധാനം ചെയ്യുന്ന മോഹന്‍ലാല്‍ ചിത്രം എമ്പുരാന്റെ ക്യാരക്ടര്‍ ലുക്ക് പുറത്തുവന്നു.മോഹന്‍ലാല്‍ അവതരിപ്പിക്കുന്ന ഖുറേഷി എബ്രഹാം എന്ന കഥാപാത്രത്തിന്റെ ലുക്ക് ഇതിനോടകം തന്നെ സോഷ്യല്‍ മീഡിയയില്‍ വൈറലായി. പൃഥ്വിരാജും സിനിമയിലെ മറ്റ് താരങ്ങളും അണിയറ പ്രവര്‍ത്തകരും പോസ്റ്റര്‍ പങ്കുവെച്ചിട്ടുണ്ട്. മാസ് ഗെറ്റപ്പില്‍ നടന്നു നീങ്ങുന്ന മോഹന്‍ലാലിനെയാണ് പോസ്റ്ററില്‍ കാണാനാകുന്നത്.ഖുറേഷി എബ്രഹാമിന് ചുറ്റിലും തോക്ക് ധാരികളായ സെക്യൂരിറ്റി ഗാര്‍ഡ്‌സും പോസ്റ്ററില്‍ കാണാനാകുന്നു.

 എമ്പുരാന്റെ ഷൂട്ടിംഗ് നിലവില്‍ പുരോഗമിക്കുകയാണ്. തിരുവനന്തപുരത്ത് നടക്കുന്ന ചിത്രീകരണത്തിന്റെ ലൊക്കേഷന്‍ വീഡിയോകള്‍ കഴിഞ്ഞദിവസം പുറത്തുവന്നിരുന്നു. 2024 അവസാനത്തോടെ റിലീസ് ചെയ്യാനാണ് നിര്‍മാതാക്കള്‍ പദ്ധതിയിടുന്നത്.

 മലയാളത്തിന് പുറമെ തമിഴ്, തെലുങ്ക്, കന്നഡ, ഹിന്ദി ഭാഷകളിലായി പാന്‍ ഇന്ത്യന്‍ റിലീസ് ആണ് എമ്പുരാന്‍.ഇന്ദ്രജിത്ത്, ടൊവിനോ തോമസ്, മഞ്ജു വാര്യര്‍ എന്നിവര്‍ക്കൊപ്പം സുരാജ് വെഞ്ഞാറമൂടും സിനിമയിലുണ്ട്.ലൂസിഫറില്‍ സയിദ് മസൂദ് എന്ന കഥാപാത്രത്തെ പൃഥ്വിരാജ് അവതരിപ്പിച്ചിരുന്നു .രണ്ടാം ഭാഗത്തിലും നടന്‍ അഭിനയിക്കാനാണ് സാധ്യത.

മുരളി ഗോപിയാണ് എമ്പുരാന്റെ തിരക്കഥ ഒരുക്കുന്നത്. സുജിത്ത് വാസുദേവ് ഛായാഗ്രഹണവും ദീപക് ദേവ് സംഗീതസംവിധാനവും നിര്‍വഹിക്കുന്നു.