ആമിനാത്തയുടെ ചിരിക്ക് പിന്നിൽ ഒരു സങ്കടകഥയുണ്ട്: ബിഗ് ബോസ് താരം ജീവിതം പറഞ്ഞപ്പോൾ

മറ്റൊരു ബിഗ്ബോസ് സീസണ് കൂടി ഇന്നലെ കളം തെളിഞ്ഞിരിക്കുകയാണ്. ഷോ തുടങ്ങുന്നതിന് ആഴ്ചകൾക്ക് മുൻപ് തന്നെ ബിഗ്ബോസിൽ യൂട്യൂബറായ ജുനൈസ് ഷോയിലുണ്ടാകുമെന്ന് വാർത്തകളുണ്ടായിരുന്നു. യൂട്യൂബിലെ കോമഡി വീഡിയോകളിലൂടെ നമ്മളെ ഏറെ ചിരിപ്പിച്ച ജുനൈസിൻ്റെ ജീവിതം പക്ഷേ അത്ര ചിരി നിറഞ്ഞതായിരുന്നില്ല.

തൻ്റെ ജീവിതത്തിൻ്റെ ഇരുണ്ടകാലങ്ങളെ പറ്റി മുൻപ് ജുനൈസ് യൂട്യൂബിലൂടെ പങ്കുവെച്ച കാര്യങ്ങളാണ് താരം ബിഗ്ബോസിലെത്തുമ്പോൾ വീണ്ടും ചർച്ചയാകുന്നത്. എൻ്റെ ഉപ്പാക്കും ഉമ്മാക്കും എന്ത് സംഭവിച്ചു എന്ന തലക്കെട്ടോടെയായിരുന്നു ജുനൈസ് മുൻപ് യൂട്യൂബിൽ വീഡിയോ പങ്കുവെച്ചത്. തൻ്റെ ഉമ്മ ഗാർഹിക പീഡനത്തിന് ഇരയായിരിന്നെന്നും തനിക്ക് 8 മാസം പ്രായമുള്ളപ്പോളായിരുന്നു ഉമ്മയുടെ മരണമെന്നും ജുനൈസ് പറയുന്നു.

ഉപ്പയും ഉമ്മയും തമ്മിലെന്തോ പ്രശ്നമുണ്ടായി. അപ്പോൾ കയ്യിലുണ്ടായിരുന്ന എന്തോ ഒന്നെടുത്ത് ഉപ്പ ഉമ്മയെ എറിയുകയായിരുന്നു. ആ എറിയലിൽ ഉമ്മ മരിച്ചുവെന്നാണ് ജുനൈസ് അന്ന് തുറന്ന് പറഞ്ഞത്. എന്നാൽ ഓർമവെച്ച കാലം മുതൽ മാതാപിതാക്കൾ ഇല്ലാത്തതിൻ്റെ കുറവ് താൻ അറിഞ്ഞിട്ടില്ലെന്നും ജേഷ്ഠന്മാർ, ഉമ്മയുടെ ആങ്ങള,അവരുടെ ഭാര്യ,2 പെങ്ങന്മാർ എന്നിവരാണ് തനിക്കുള്ളതെന്നും ഇവരെല്ലാം ഉള്ളതിനാൽ ചെറുപ്പത്തിൽ സങ്കടങ്ങളോ ബുദ്ധിമുട്ടുകളോ അനുഭവിക്കേണ്ടി വന്നില്ലെന്നും താൻ തൻ്റെ ജീവിതത്തിൽ ഹാപ്പിയാണെന്നും അന്ന് ജുനൈസ് പറഞ്ഞിരുന്നു.

ടോക്സിക്കായ റിലേഷൻഷിപ്പുകളിൽ നിന്നും മറുത്തൊന്ന് ചിന്തിക്കാൻ പോലും നിൽക്കാതെ പുറത്തുചാടണമെന്നാണ് തൻ്റെ അനുഭവത്തിൻ്റെ വെളിച്ചത്തിൽ തനിക്ക് പറയാനുള്ളതെന്നും വിവാഹം ഒന്നിനുമുള്ള പരിഹാരമല്ലെന്നും സാമ്പത്തിക സ്വാതന്ത്ര്യമാണ് വേണ്ടതെന്നും ജുനൈസ് പറയുന്നു.