റോയ് സിനിമ എപ്പോള്‍ വരും?കാരണങ്ങള്‍ വിളിച്ചു പറയണമെന്ന് പല തവണ തോന്നി,പക്ഷെ പറയുന്നില്ലെന്ന് സുനില്‍ ഇബ്രാഹിം

സുരാജിന്റെ പല സിനിമകളും റിലീസായി പോയിട്ടും വളരെ മുമ്പ് ചിത്രീകരണം പൂര്‍ത്തിയാക്കിയ നടന്റെ 'റോയ്' എന്ന ചിത്രം മാത്രം വൈകി.സിനിമയുടെയോ അതിന്റെ പിന്നില്‍ പ്രവര്‍ത്തിച്ച ടീമിന്റെയോ തെറ്റല്ല ഈ കാലതാമസമെന്ന് സംവിധായകന്‍ സുനില്‍ ഇബ്രാഹിം.ഇനിയും ഒരുപാട് വൈകിപ്പിക്കാന്‍ അനുവദിക്കില്ലെന്നും അദ്ദേഹം പറയുന്നു.

സുനില്‍ ഇബ്രാഹിമിന്റെ വാക്കുകള്‍

#റോയ് സിനിമ എപ്പോള്‍ വരും?

സിനിമ വിചാരിച്ചത് പോലെ നന്നായില്ലേ?ടെക്നിക്കലി എന്തെങ്കിലും പ്രശ്‌നമായോ?

കോവിഡ് കഥയാണോ? കഥയുടെ പ്രസക്തി നഷ്ടമായോ? ബിസിനസ് ആവുന്നില്ലേ?നിയമപരമായ എന്തെങ്കിലും കുരുക്കില്‍പ്പെട്ടോ?

വൈകുന്തോറും കാരണമന്വേഷിക്കുന്ന മെസ്സേജുകളില്‍ പലതും ഇങ്ങിനെയൊക്കെയായി മാറുന്നത് കൊണ്ടാണ് ഇതെഴുതുന്നത്. 

ഈ ചോദ്യങ്ങളില്‍ ഒന്ന് പോലും റോയ് വൈകാനുള്ള യഥാര്‍ത്ഥ കാരണമല്ല എന്ന് മാത്രം തല്ക്കാലം എല്ലാവരും മനസിലാക്കണം. സിനിമയുടെയോ അതിന്റെ പിന്നില്‍ പ്രവര്‍ത്തിച്ച ടീമിന്റെയോ തെറ്റല്ല ഈ കാലതാമസം എന്നറിയുക. കാരണങ്ങള്‍ എല്ലാവരോടും വിളിച്ചു പറയണമെന്നൊക്കെ പല തവണ തോന്നിയിട്ടുണ്ട്, പക്ഷെ പറയുന്നില്ല. 

ഞങ്ങള്‍ നിങ്ങള്‍ക്ക് നല്‍കേണ്ടത് വാര്‍ത്തകളും വിവാദങ്ങളുമൊന്നുമല്ല, നല്ല സിനിമകളാണ് എന്ന് വിവേകപൂര്‍വം തിരിച്ചറിയുന്നു. 

ഈ സാഹചര്യത്തില്‍ ഏറ്റവുമധികം നിരാശരാവേണ്ട ഞങ്ങള്‍ ഫുള്‍ പവറില്‍ ഇപ്പോഴും കാത്തിരിക്കുന്നത് സിനിമയില്‍ അത്രക്ക് പ്രതീക്ഷയുള്ളത് കൊണ്ടാണ്.

ഇനിയും ഒരുപാട് വൈകിപ്പിക്കാന്‍ അനുവദിക്കില്ല എന്ന് മാത്രം ഉറപ്പ് തരുന്നു. 

സ്‌നേഹത്തോടെ എല്ലാവരും ഒപ്പമുണ്ടാവണം ...!