മമ്മൂട്ടിയുടെ പുതിയ സിനിമ ‘പരോള്‍’ പ്രദര്‍ശനത്തിന് തയ്യാറാവുകയാണ്. ചിത്രത്തിന്‍റെ ആദ്യലുക്ക് പോസ്റ്റര്‍ പുറത്തുവിട്ടിരിക്കുന്നു. വളരെ കര്‍ക്കശക്കാരനായ ഒരു ജയിലറുടെ വേഷത്തിലാണ് മമ്മൂട്ടി എത്തുന്നത്. അതിനെ സാക്‍ഷ്യപ്പെടുത്തുന്നതാണ് പോസ്റ്ററിലെ മമ്മൂട്ടിയുടെ ലുക്ക്.
പരോള്‍ എന്ന ടൈറ്റില്‍ എഴുതിയിരിക്കുന്നതിലുമുണ്ട് പ്രത്യേകത. ജയിലഴികള്‍ക്കുള്ളില്‍ നിന്ന് പേര് പുറത്തേക്ക് വരുന്ന രീതിയിലാണ് ടൈറ്റില്‍. കൊടികളുയര്‍ത്തി ഒരു സംഘം പ്രക്ഷോഭകാരികള്‍ ഓടിവരുന്ന ഒരു ദൃശ്യവും പോസ്റ്ററില്‍ കൊടുത്തിട്ടുണ്ട്. അതില്‍ മുന്‍‌നിരയില്‍ ഓടിവരുന്നയാള്‍ സോഹന്‍ സീനുലാലാണ്.
ഈ സിനിമയില്‍ രണ്ട് നായികമാരാണുള്ളത്. ഇനിയ മമ്മൂട്ടിയുടെ ഭാര്യയായി അഭിനയിക്കുന്നു. മിയ സഹോദരിയായെത്തുന്നു. ബാഹുബലിയില്‍ കാലകേയ രാജാവിനെ അവതരിപ്പിച്ച തെലുങ്കുനടന്‍ പ്രഭാകറാണ് പരോളിലെ വില്ലന്‍.
സിദ്ദിക്ക്, സുരാജ് വെഞ്ഞാറമ്മൂട് തുടങ്ങിയവരും മികച്ച കഥാപാത്രങ്ങളെ അവതരിപ്പിക്കുന്ന പരോള്‍ സംവിധാനം ചെയ്തിരിക്കുന്നത് നവാഗതനായ ശരത് സന്ദിത് ആണ്. അജിത് പൂജപ്പുരയാണ് തിരക്കഥ രചിച്ചിരിക്കുന്നത്.
ബാംഗ്ലൂരിലും കേരളത്തിലുമായി ചിത്രീകരിച്ച പരോള്‍ ഒരു ത്രില്ലര്‍ മൂഡിലുള്ള ഫാമിലി ഡ്രാമയാണ്. ആന്‍റണി ഡിക്രൂസ് നിര്‍മ്മിച്ചിരിക്കുന്ന സിനിമ സെഞ്ച്വറി ഫിലിംസാണ് പ്രദര്‍ശനത്തിനെത്തിക്കുന്നത്.
എസ് ലോകനാഥന്‍ ക്യാമറ ചലിപ്പിച്ചിരിക്കുന്ന സിനിമയുടെ സംഗീതം ശരത് ആണ്. സില്‍‌വയാണ് ആക്ഷന്‍ രംഗങ്ങള്‍ ചിട്ടപ്പെടുത്തിയത്.