'ശ്രീദേവിക്ക് ശേഷം ഹിന്ദിയില്‍ കോമഡി ചെയ്യുന്ന ഒരേയൊരു നടി', വീണ്ടും സ്വയം പുകഴ്ത്തി കങ്കണ

ബോളിവുഡില്‍ ഒരുപാട് ആരാധകരുള്ള താരമാണ് കങ്കണ റണൗട്ട്. 'തനു വെഡ്‌സ് മനു' എന്ന സിനിമ പുറത്തിറങ്ങിയിട്ട് 10 വര്‍ഷം തികയുന്ന വേളയിലാണ് താരം സ്വയം പുകഴ്ത്തിയത്. തന്റെ കരിയര്‍ മാറ്റിമറിച്ചത് ഈ ചിത്രമാണെന്നും ശ്രീദേവിക്ക് ശേഷം ഹിന്ദിയില്‍ കോമഡി ചെയ്യുന്ന ഒരേയൊരു നടി താനാണെന്നുമാണ് കങ്കണ പറയുന്നത്.

'മൂര്‍ച്ചയേറിയ കഥാപാത്രങ്ങള്‍ മാത്രം ചെയ്തിരുന്ന എന്റെ കരിയര്‍ മാറ്റിമറിച്ചത് ഈ ചിത്രമാണ്.അതും ഹാസ്യത്തിലൂടെ മുഖ്യധാരയിലേക്കുള്ള എന്റെ പ്രവേശനമായിരുന്നു, ക്വീന്‍, ഡാട്ടോ എന്നീ സിനിമകളില്‍ ഞാന്‍ കുറച്ചുകൂടി ശക്തമായ കോമഡി ചെയ്തു. ശ്രീദേവി ജിക്ക് ശേഷം കോമഡി ചെയ്യുന്ന ഒരേയൊരു നടിയായി. 'തനു വെഡ്‌സ് മനു'വിന്റെ പത്ത് വര്‍ഷങ്ങള്‍.'-കങ്കണ ട്വിറ്ററില്‍ കുറിച്ചു.

അതേസമയം ഇതിനുമുമ്പും നടി സ്വയം പുകഴ്ത്തി രംഗത്തെത്തിയിട്ടുണ്ട്. ലോകത്ത് തന്നെക്കാള്‍ കഴിവുറ്റ മറ്റൊരു നടി ഇല്ലെന്നാണ് കങ്കണ നേരത്തെ പറഞ്ഞത്.