ദിലീപിൻ്റെ നായികയായി കാവ്യ നന്നായിരിക്കുമെന്ന് പറഞ്ഞത് മഞ്ജു: ലാൽ ജോസ്

മലയാള സിനിമയ്ക്ക് ഒട്ടേറെ പുതുമുഖ നായികമാരെ സമ്മാനിച്ച സംവിധായകനാണ് ലാൽ ജോസ്. കാവ്യാ മാധവൻ മുതൽ മീര നന്ദനും ആൻ അഗസ്റ്റിനും തുടങ്ങി ദീപ്തി സതി വരെയുള്ള നായികമാർ ഈ പട്ടികയിൽ ഉൾപ്പെടുന്നു. ലാൽ ജോസ് സംവിധാനം ചെയ്ത രണ്ടാമത്തെ സിനിമയായ ചന്ദ്രനുദിക്കുന്ന ദിക്കിൽ എന്ന സിനിമയിലാണ് കാവ്യ മാധവൻ ആദ്യമായി നായികയായത്. ദിലീപായിരുന്നു ചിത്രത്തിലെ നായകൻ.

അത്രയും നാൾ ബാലതാരമായി തിളങ്ങി നിന്നിരൂന്ന കാവ്യാ മാധവനെ ആദ്യമായി നായികയാക്കുമ്പോൾ ആ തീരുമാനത്തിന് പിന്നിൽ മഞ്ജു വാര്യർക്കും പങ്കുണ്ടെന്ന് പറയുകയാണ് ലാൽ ജോസ്. സഫാരി ടിവിയിലെ ചരിത്രം എന്ന പരിപാടിയിലാണ് ലാൽ ജോസ് മനസ് തുറന്നത്. ചന്ദ്രനുദിക്കുന്ന ദിക്കിൽ എന്ന സിനിമയുടെ സമയത്താണ് ദിലീപ് മഞ്ജുവിനെ വീട്ടിൽ നിന്ന് ഇറക്കികൊണ്ടുവന്ന് ആലുവയിലെ അമ്പലത്തിൽ വെച്ച് വിവാഹം ചെയ്തത്.

ഞാനും ബിജുമേനോനും കലാഭവൻ മണിയുമെല്ലാം ആ ഓപ്പറേഷന് പിന്നിലുണ്ടായിരുന്നു. അതിനെല്ലാം ശേഷമാണ് ഞങ്ങൾ കാസ്റ്റിംഗിലേക്ക് കടന്നത്. ഇതിനായി ശാലിനിയെ ഞങ്ങൾ സമീപിച്ചിരുന്നു. എന്നാൽ മറ്റ് സിനിമകളുടെ തിരക്കിനിടയിൽ ശാലിനിക്ക് അഭിനയിക്കാനായില്ല. അങ്ങനെ നായികയെ തപ്പുന്നതിനിടെയിലാണ് ഷൊർണ്ണൂരിലെ ഒരു ലൊക്കേഷനിൽ വെച്ച് കാവ്യയേയും അമ്മയേയും കാണൂന്നത്. അങ്ങനെ ദിലീപിൻ്റെ വീട്ടിൽ വെച്ച് ശാലിനിയുടെ കാര്യം നടക്കില്ല പുതിയ കുട്ടിയെ നോക്കാം എന്ന് പറഞ്ഞ് കാവ്യയുടെ കാര്യവും പറഞ്ഞു.

അന്ന് കാവ്യ നായികയായിട്ടില്ല. നായികയായി അഭിനയിക്കുമോ ചെറിയ കുട്ടിയായി തോന്നുമോ എന്നെല്ലാം സംശയമുണ്ടായിരുന്നു. അന്ന് മഞ്ജുവാണ് പറഞ്ഞത് കാവ്യ കറക്ട് ആയിരിക്കുമെന്ന്. അന്ന് കാവ്യ ഒമ്പതാം ക്ലാസ് കഴിഞ്ഞു നിൽക്കുകയായിരുന്നു. ലാൽ ജോസ് പറഞ്ഞു.