'ഫഹദ് ഫാസില്‍ നിന്ന് കണ്ണെടുക്കാന്‍ ആകുന്നില്ല', സ്‌പെഷ്യല്‍ വീഡിയോ പുറത്തിറക്കി നെറ്റ്ഫ്‌ലിക്‌സ് !
വെള്ളി, 9 ഏപ്രില്‍ 2021 (09:02 IST)
മോളിവുഡും കോളിവുഡും കടന്ന് ടോളിവുഡ് വരെ എത്തി നില്‍ക്കുകയാണ് ഫഹദ് ഫാസില്‍ എന്ന പേര്. സിനിമ തിരക്കുകളില്‍ നിന്ന് തിരക്കുകളിലേക്ക് യാത്ര ചെയ്യുന്ന നടന്റെ ഈ മാസം മാത്രം റിലീസ് ചെയ്തത് രണ്ട് ചിത്രങ്ങളാണ്. ജോജി, ഇരുള്‍ എന്നീ രണ്ട് ചിത്രങ്ങളും പ്രമുഖ ഒ.ടി.ടി പ്ലാറ്റ്‌ഫോമുകളായ ആമസോണ്‍ പ്രൈം, നെറ്റ്ഫ്‌ലിക്‌സിലൂടെയാണ് പ്രേക്ഷകരിലേക്ക് എത്തിയത്. അല്ലു അര്‍ജുനൊപ്പം പുഷ്പ എന്ന ചിത്രവും ഇനി പുറത്തു വരാനുണ്ട്. ഇപ്പോളിതാ മലയാളികളുടെ പ്രിയതാരം ഫഹദില്‍ നിന്നും കണ്ണെടുക്കാന്‍ ആവുന്നില്ലെന്ന് പറഞ്ഞുകൊണ്ട് സ്‌പെഷ്യല്‍ വീഡിയോ പങ്കുവെച്ചിരിക്കുകയാണ് നെറ്റ്ഫ്‌ലിക്‌സ്.
ഫഹദിന്റെ അഭിനയ മാന്ത്രികത തന്നെയാണ് വീഡിയോയില്‍ കാണാനാകുന്നത്. മാത്രമല്ല മുഖത്ത് വിരിയുന്ന ഓരോ ഭാവങ്ങളും പ്രേക്ഷകര്‍ക്ക് ആസ്വദിക്കാനാകും. അടുത്തിടെ പുറത്തുവന്ന ഇരുള്‍ എന്ന ചിത്രത്തിലെ രംഗങ്ങള്‍ കോര്‍ത്തിണക്കി കൊണ്ടാണ് നെറ്റ്ഫ്‌ലിക്‌സ് ഇന്ത്യ ഹസ്വ വീഡിയോ പങ്കുവെച്ചത്. സൗബിന്‍, ദര്‍ശന രാജേന്ദ്രന്‍ എന്നിവരാണ് ഇരുളില്‍ പ്രധാനവേഷങ്ങളിലെത്തിയത്.