കെജിഎഫ് ലെവലിലില്ല?, പക്ഷേ ബോക്സോഫീസിൽ ആദ്യ ദിനം തന്നെ 100 കോടിയ്ക്കരികിലെത്തി പ്രഭാസ് ചിത്രം സലാർ

2023ലെ ഏറ്റവും വലിയ ആദ്യദിന കളക്ഷന്‍ റെക്കോര്‍ഡ് കുറിച്ച് പ്രഭാസ് പ്രശാന്ത് നീല്‍ ചിത്രം സലാര്‍. ബാഹുബലിയ്ക്ക് ശേഷം കാര്യമായി വിജയങ്ങളൊന്നും നല്‍കാന്‍ കഴിയാതിരുന്ന പ്രഭാസിന്റെ തിരിച്ചുവരവായാണ് സലാര്‍ ആഘോഷിക്കപ്പെടുന്നത്. പ്രഭാസിന് പുറമെ പൃഥ്വിരാജാണ് ചിത്രത്തിലെ മറ്റൊരു പ്രധാനവേഷത്തിലെത്തിയിരിക്കുന്നത്. ഈ വര്‍ഷത്തെ ഏറ്റവും വലിയ ഹിറ്റുകളായ ജവാന്‍,ആനിമല്‍,പത്താന്‍ എന്നീ ചിത്രങ്ങളുടെ റെക്കോര്‍ഡ് നേട്ടമാണ് സലാര്‍ മറികടന്നത്.

ആദ്യദിനത്തിലെ കളക്ഷന്‍ കണക്കുകള്‍ പുറത്തുവരുമ്പോള്‍ 95 കോടി രൂപയാണ് ചിത്രം കളക്ട് ചെയ്തിരിക്കുന്നത്. ആരാധകര്‍ക്കിടയില്‍ നിന്നും മികച്ച പ്രതികരണമാണ് ചിത്രത്തിന് ലഭിക്കുന്നത്. അതേസമയം മിക്‌സഡ് റിവ്യൂകളാണ് ചിത്രത്തിന് കേരളത്തില്‍ നിന്നും ലഭിക്കുന്നത്. ആന്ധ്രാപ്രദേശ്,തെലുങ്കാന മേഖലയില്‍ നിന്ന് മാത്രം 70 കോടി രൂപയാണ് ചിത്രം കളക്ട് ചെയ്തത്. കര്‍ണാടകയില്‍ നിന്നും 12 കോടിയും കേരളത്തില്‍ നിന്നും 5 കോടിയും ആദ്യദിനം ചിത്രം കളക്റ്റ് ചെയ്തു.

ജവാന്റെ ആദ്യദിന കളക്ഷന്‍ റെക്കോര്‍ഡാണ് സലാര്‍ മറികടന്നത്. 75 കോടി രൂപയായിരുന്നു ഷാറൂഖ് ചിത്രമായ ജവാന്‍ ആദ്യ ദിനത്തില്‍ നേടിയിരുന്നത്. അതേസമയം പ്രഭാസ് ചിത്രമായ സലാര്‍ രണ്ടുഭാഗങ്ങളിലായാകും പുറത്തിറങ്ങുക. ശൗരഘ്യ പര്‍വം എന്ന പേരിലാകും സലാറ് രണ്ടാം ഭാഗം റിലീസ് ചെയ്യുക.