ദുൽഖറിന് പിന്നാലെ പ്രണവും, ഇത് വേണ്ടിയിരുന്നോ എന്ന് ആരാധകർ

കൊത്തയുടെ പരാജയത്തിന് ശേഷം ദുൽഖർ സൽമാൻ മലയാളത്തിൽ ഒരു സിനിമ ചെയ്തിട്ടില്ല. മലയാളത്തിൽ ദുൽഖറിന്റേതായി പുതിയ സിനിമകളൊന്നും അണിയറയിൽ ഒരുങ്ങുന്നില്ലെന്നാണ് റിപ്പോർട്ട്. നിലവിൽ തെലുങ്കിൽ ശ്രദ്ധ കേന്ദ്രീകരിച്ചിരിക്കുകയാണ് താരം. ലക്കി ഭാസ്കർ ആണ് ദുൽഖറിന്റേതായി ഇനി പുറത്തിറങ്ങാനുള്ള തെലുങ്ക് ചിത്രം. ഇപ്പോഴിതാ, ദുൽഖറിന് പിന്നാലെ പ്രണവ് മോഹൻലാലും തെലുങ്കിലേക്ക് ചുവടുമാറ്റാൻ ഉദ്ദേശിക്കുന്നതായി റിപ്പോർട്ട്. 

കൃതി ഷെട്ടിയുടെ നായകനായി തെലുങ്കില്‍ അരങ്ങേറ്റം കുറിക്കാനൊരുങ്ങുകയാണ് നടന്‍ പ്രണവ് മോഹന്‍ലാല്‍. ജനതാ ഗാരേജ്, ദേവര എന്നീ സിനിമകള്‍ ഒരുക്കിയ കൊരട്ടല ശിവ സംവിധാനം ചെയ്യുന്ന അടുത്ത ചിത്രത്തില്‍ പ്രണവ് നായകനായി എത്തും. ‘കില്‍’ എന്ന ബോളിവുഡ് ചിത്രത്തിലൂടെ ശ്രദ്ധ നേടിയ രാഘവ് ജുയലും ചിത്രത്തില്‍ ഒരു പ്രധാന വേഷത്തിലെത്തുന്നുണ്ട്. 

ഒരു റൊമാന്റിക് ആക്ഷന്‍ ഴോണറില്‍ ഒരുങ്ങുന്ന ഈ ചിത്രത്തില്‍ ഹരീഷ് കല്യാണ്‍, നിത്യ മേനോന്‍, കാവ്യ ഥാപ്പര്‍, നവീന്‍ പോളി ഷെട്ടി, കാശ്മീരാ, ചേതന്‍ കുമാര്‍ തുടങ്ങി നിരവധി താരങ്ങളും വേഷമിടുന്നുണ്ട്. ചിത്രത്തിന്റെ ഷൂട്ടിങ് അടുത്ത വര്‍ഷം ആരംഭിക്കുമെന്നാണ് ചില തെലുങ്ക് മീഡിയകള്‍ റിപ്പോര്‍ട്ട് ചെയ്യുന്നത്. മൈത്രി മൂവി മേക്കേഴ്‌സ് ആകും സിനിമ നിര്‍മ്മിക്കുന്നത്. 

അതേസമയം, വിനീത് ശ്രീനിവാസന്‍ സംവിധാനം ചെയ്ത ‘വര്‍ഷങ്ങള്‍ക്ക് ശേഷം’ എന്ന ചിത്രത്തിലാണ് പ്രണവ് അവസാനമായി അഭിനയിച്ചത്. ഇതിലെ പ്രണവിന്റെ കഥാപാത്രം ട്രോളുകൾക്ക് കാരണമായി. ചിത്രം ഹിറ്റായെങ്കിലും അതുകൊണ്ട് പ്രണവിന്റെ പ്രത്യേകിച്ച് ഗുണമൊന്നും ഉണ്ടായില്ലെന്ന് വേണം പറയാൻ. ഇപ്പോഴത്തെ ഈ ചുവടുമാറ്റം അനിവാര്യമാണോ എന്നും ദുൽഖറിന്റെ പാതയിലേക്ക് തന്നെ ആകുമോ എന്ന ആശങ്കയും ആരാധകർ പങ്കുവെക്കുന്നുണ്ട്.