'ഈ പടത്തിലൊരു ക്യാരക്ടര്‍ ഉണ്ട്, മുന്‍പൊന്നും അങ്ങനെയൊരു കഥാപാത്രത്തെ ഞാന്‍ കണ്ടിട്ടില്ല'; വേട്ടൈയനിലെ ഫഹദിനെ കുറിച്ച് രജനി

പാട്രിക് എന്നാണ് വേട്ടൈയനിലെ ഫഹദിന്റെ കഥാപാത്രത്തിന്റെ പേര്

Fahadh Faasil and Rajanikanth (Vettaiyan Movie )

രജനികാന്ത് നായകനാകുന്ന ടി.ജെ.ജ്ഞാനവേല്‍ ചിത്രം 'വേട്ടൈയന്‍' റിലീസിനു ഒരുങ്ങുകയാണ്. മലയാളത്തില്‍ നിന്ന് ഫഹദ് ഫാസിലും മഞ്ജു വാരിയറും വേട്ടൈയനില്‍ ശ്രദ്ധേയമായ കഥാപാത്രങ്ങള്‍ അവതരിപ്പിച്ചിട്ടുണ്ട്. ഫഹദിന്റെ കഥാപാത്രത്തെ കുറിച്ച് സിനിമയുടെ ഓഡിയോ ലോഞ്ചിനിടെ രജനി പറഞ്ഞ വാക്കുകളാണ് ഇപ്പോള്‍ ആരാധകരെ ആവേശത്തിലാക്കിയിരിക്കുന്നത്. താന്‍ മുന്‍പൊന്നും ഇങ്ങനെയൊരു കഥാപാത്രത്തെ കണ്ടിട്ടില്ലെന്നാണ് രജനി പറയുന്നത്. 

' ഈ സിനിമയില്‍ ഒരു കഥാപാത്രമുണ്ട്, അതിഗംഭീരമാണ് ആ കഥാപാത്രം. ഞാന്‍ മുന്‍പൊന്നും ഒരു സിനിമയിലും ഇങ്ങനെയൊരു ക്യാരക്ടര്‍ കണ്ടിട്ടില്ല. പൂര്‍ണമായും ഒരു എന്റര്‍ടെയ്‌നര്‍ കഥാപാത്രമാണ് അത്. ഫഹദ് ഫാസില്‍ തന്നെ ആ റോള്‍ ചെയ്യണമെന്നായിരുന്നു സംവിധായകന്. ആ കഥാപാത്രം ഫഹദിന് ഇഷ്ടമാകുകയും പ്രതിഫലം പോലും ഇല്ലാതെ ചെയ്യാന്‍ തയ്യാറായിരുന്നെന്നും സംവിധായകന്‍ പറഞ്ഞിരുന്നു,' രജനി പറഞ്ഞു. 

പാട്രിക് എന്നാണ് വേട്ടൈയനിലെ ഫഹദിന്റെ കഥാപാത്രത്തിന്റെ പേര്. ഹാസ്യത്തിനു പ്രാധാന്യം നല്‍കിയാണ് ഈ കഥാപാത്രത്തെ സംവിധായകന്‍ ചിത്രത്തില്‍ അവതരിപ്പിച്ചിരിക്കുന്നത്. ലൈക പ്രൊഡക്ഷന്‍സ് നിര്‍മിക്കുന്ന വേട്ടൈയന്‍ ഒക്ടോബര്‍ 10 നാണ് തിയറ്ററുകളിലെത്തുക. ശ്രീ ഗോകുലം മൂവീസ് ആണ് കേരളത്തിലെ വിതരണാവകാശം സ്വന്തമാക്കിയിരിക്കുന്നത്. അനിരുദ്ധ് രവിചന്ദ്രനാണ് സംഗീതം.