മമ്മൂട്ടിയുടെ റോഷാക് ഒടിടി റിലീസിന്

ആഖ്യാന രീതികൊണ്ടും കഥപറച്ചിൽ രീതി കൊണ്ടും സിനിമാസ്വാദകരെ അമ്പരപ്പിച്ച മമ്മൂട്ടി ചിത്രം റോഷാക് ഒടിടി റിലീസിന് തയ്യാറെടുക്കുന്നു. ഡിസ്നി ഹോട്ട്സ്റ്റാറിലാണ് ചിത്രം സ്ട്രീം ചെയ്യുക. നവംബർ 11ന് ചിത്രം ഒടിടി റിലീസ് ചെയ്യുമെന്ന് പ്രചാരമുണ്ടെങ്കിലും ഔദ്യോഗികമായ അറിയിപ്പ് ലഭിച്ചിട്ടില്ല.

ഒക്ടോബർ 7നാണ് നിസാം ബഷീർ സംവിധാനം ചെയ്ത റോഷാക്ക് തിയേറ്ററുകളിലെത്തിയത്. പ്രഖ്യാപനസമയത്തിന് മുൻപ് തന്നെ ഫസ്റ്റ് ലുക്ക് പോസ്റ്ററുകളും ടീസറുകളും കൊണ്ട് ശ്രദ്ധ നേടിയ ചിത്രം ബോക്സോഫീസിലും വലിയ വിജയമായിരുന്നു.കെട്ട്യോളാണ് എന്‍റെ മാലാഖ എന്ന ചിത്രത്തിനു ശേഷം നിസാം ബഷീര്‍ സംവിധാനം ചെയ്ത ചിത്രത്തിൽ ബിന്ദു പണിക്കർ,ഷറഫുദ്ദീന്‍, കോട്ടയം നസീര്‍, ജഗദീഷ്, ഗ്രേസ് ആന്‍റണി, ആസിഫ് അലി എന്നിവരാണ് മറ്റ് പ്രധാന വേഷങ്ങളിലെത്തിയത്.