ഷെയ്ന്‍ നിഗം ചിത്രത്തിനു ജിസിസിയില്‍ വിലക്ക്

നാളെയാണ് ചിത്രം തിയറ്ററുകളില്‍ എത്തുന്നത്

Little Hearts Movie

ഷെയ്ന്‍ നിഗം, മഹിമ നമ്പ്യാര്‍ എന്നിവരെ കേന്ദ്ര കഥാപാത്രങ്ങളാക്കി ആന്റോ ജോസ് പെരേര, എബി ട്രീസ പോള്‍ എന്നിവര്‍ സംവിധാനം ചെയ്ത ലിറ്റില്‍ ഹാര്‍ട്ട്‌സ് സിനിമയ്ക്ക് ജിസിസിയില്‍ വിലക്ക്. ചിത്രത്തിന്റെ നിര്‍മാതാക്കളില്‍ ഒരാളായ സാന്ദ്രാ തോമസ് സോഷ്യല്‍ മീഡിയയിലൂടെയാണ് ഇക്കാര്യം അറിയിച്ചത്. ജിസിസി രാജ്യങ്ങളില്‍ തങ്ങളുടെ ചിത്രം പ്രദര്‍ശിപ്പിക്കാന്‍ കഴിയില്ലെന്നും സര്‍ക്കാര്‍ വിലക്കിയിരിക്കുകയാണെന്നും സാന്ദ്രാ തോമസ് പറഞ്ഞു. 

നാളെയാണ് ചിത്രം തിയറ്ററുകളില്‍ എത്തുന്നത്. ഇതിനിടെയാണ് ആദ്യദിന കളക്ഷനെ സാരമായി ബാധിക്കുന്ന വിധത്തില്‍ ജിസിസി രാജ്യങ്ങളില്‍ ചിത്രത്തിന്റെ റിലീസിനു വിലക്ക് ഏര്‍പ്പെടുത്തിയിരിക്കുന്നത്. ഈ സിനിമ ലോകമൊട്ടുക്കും പ്രദര്‍ശനത്തിനു എത്തിക്കണമെന്ന തന്റെ വലിയ മോഹത്തിനു തിരിച്ചടിയേറ്റെന്നും വിഷമമുണ്ടെന്നും സാന്ദ്ര പറഞ്ഞു.

രാജേഷ് പൈനാടന്‍ ആണ് തിരക്കഥ രചിച്ചിരിക്കുന്നത്. ചിത്രത്തിന്റെ അപ്‌ഡേറ്റുകളെല്ലാം സോഷ്യല്‍ മീഡിയയില്‍ ഏറെ ശ്രദ്ധിക്കപ്പെട്ടിരുന്നു. ഷൈന്‍ നിഗം, ബാബുരാജ് എന്നിവരും ലിറ്റില്‍ ഹാര്‍ട്ട്‌സില്‍ സുപ്രധാന വേഷങ്ങള്‍ അവതരിപ്പിച്ചിരിക്കുന്നു.