നടനും ജീവകാരുണ്യ പ്രവര്‍ത്തകനുമായ സോനു സൂദിന്റെ അമ്മയുടെ പിറന്നാളാണ് ഇന്ന്. അമ്മയ്ക്ക് ആശംസകള്‍ നേര്‍ന്നു കൊണ്ട് ഹൃദയസ്പര്‍ശിയായ കുറിപ്പാണ് അദ്ദേഹം പങ്കുവച്ചിരിക്കുന്നത്.2007ല്‍ അന്തരിച്ച അമ്മ സരോജ് സൂദിനെ ഓര്‍ക്കുക കൂടിയാണ് നടന്‍.
സോനു സൂദിന്റെ വാക്കുകളിലേക്ക്
'ജന്മദിനാശംസകള്‍ മാ! അമ്മയെ വ്യക്തിപരമായി ആശംസിക്കാനും നിങ്ങള്‍ എന്നെ പഠിപ്പിച്ച ജീവിത പാഠങ്ങള്‍ക്ക് നന്ദി പറയാനും ഞാന്‍ ആഗ്രഹിക്കുന്നു. ഞാന്‍ അമ്മയെ എത്രമാത്രം മിസ് ചെയ്യുന്നുവെന്ന് ഈ സന്ദേശങ്ങളിലൂടെ ഒരിക്കലും പ്രകടിപ്പിക്കാന്‍ കഴിയില്ല. അമ്മയുടെ അഭാവം എന്റെ ജീവിതത്തില്‍ സൃഷ്ടിച്ച ശൂന്യത ഞാന്‍ നിങ്ങളെ വീണ്ടും കാണുന്നത് വരെ അങ്ങനെ തന്നെ തുടരും'- സോനു സൂദ് ട്വിറ്ററില്‍ കുറിച്ചു.
ലോക്ക് ഡൗണ്‍ സമയത്ത് ജനങ്ങള്‍ക്കായി ഒരുപാട് സഹായങ്ങള്‍ ചെയ്തു കൊണ്ട് മുന്നില്‍ തന്നെ ഉണ്ടായിരുന്നു സോനു സൂദ്. പല സ്ഥലങ്ങളിലും കുടുങ്ങിപ്പോയ തൊഴിലാളികളെ അവരുടെ മുമ്പിലേക്ക് തിരികെ എത്തിക്കാനും ജോലി നഷ്ടമായവര്‍ക്ക് ഉപജീവന മാര്‍ഗം ഒരുക്കാനും സോനു സൂദ് മുന്‍കൈ എടുത്തിരുന്നു.
അടുത്തിടെ സോനു സൂദിന്റെ സൂപ്പര്‍മാര്‍ക്കറ്റ് സോഷ്യല്‍ മീഡിയയില്‍ ശ്രദ്ധ നേടിയിരുന്നു.ചെറുകിട ബിസിനസ്സുകളെ പ്രോത്സാഹിപ്പിക്കുന്നതിനു വേണ്ടിയാണ് താരം രംഗത്തെത്തിയത്. പ്രാദേശിക കച്ചവടക്കാരില്‍ നിന്ന് സാധനങ്ങള്‍ വാങ്ങേണ്ടതിന്റെ പ്രാധാന്യം ഓര്‍മ്മിപ്പിക്കാനായി അദ്ദേഹം മുട്ട, റൊട്ടി, ചിപ്‌സ് തുടങ്ങിയ സാധനങ്ങളുമായി ഒരു സൈക്കിളില്‍ എത്തിയിരുന്നു. ആ വീഡിയോ സോഷ്യല്‍ മീഡിയയില്‍ വൈറലായി മാറി.