നീചന്മാരുടേയും പാപികളുടേയും അന്തകൻ, ദ പ്രീസ്റ്റ്! - ദുരൂഹത സൃഷ്ടിച്ച് മമ്മൂട്ടി ചിത്രം

മെഗാപ്രൊജക്ടുകള്‍ തുടര്‍ച്ചയായി ചെയ്‌തുകൊണ്ട് ഏവരെയും വിസ്‌മയിപ്പിക്കുകയാണ് മമ്മൂട്ടി. പുതിയ ചിത്രത്തിന്റെ ഫസ്റ്റ്‌ലുക്ക് പുറത്തുവിട്ട് അണിയറപ്രവര്‍ത്തകര്‍. ദ പ്രീസ്റ്റ് എന്നാണ് സിനിമയുടെ പേര്. ഒരു പുരോഹിതനായാണ് മമ്മൂട്ടി ഇതില്‍ അഭിനയിക്കുന്നത്. 

മമ്മൂട്ടിക്കൊപ്പം ആദ്യമായി മഞ്‌ജു വാര്യര്‍ നായികയായി എത്തുന്ന ചിത്രം കൂടിയാണിത്. നവാഗതനായ ജോഫിന്‍ ടി ചാക്കോ സംവിധാനം ചെയ്യുന്ന സിനിമ നിര്‍മ്മിക്കുന്നത് ബി ഉണ്ണികൃഷ്‌ണനും ആന്‍റോ ജോസഫും ചേര്‍ന്നാണ്. നിഖില വിമൽ, ശ്രീനാഥ് ഭാസി തുടങ്ങിയവരും ഈ സിനിമയില്‍ പ്രധാന വേഷങ്ങൾ കൈകാര്യം ചെയ്യുന്നുണ്ട്. 

ജോഫിന്‍റെ തിരക്കഥ വായിച്ച് ആവേശത്തിലായ മമ്മൂട്ടി മറ്റ് പ്രൊജക്‍ടുകള്‍ മാറ്റിവച്ച് ഈ സിനിമയ്‌ക്ക് ഡേറ്റ് നല്‍കുകയായിരുന്നു. മലയാളത്തില്‍ ഇതുവരെ പറഞ്ഞിട്ടില്ലാത്ത ഒരു സബ്‌ജക്‍ടാണ് ഈ സിനിമ പറയുന്നത് എന്നാണ് റിപ്പോര്‍ട്ടുകള്‍.

ഏറെ പ്രത്യേകതകളുള്ളതായിരിക്കും ഈ സിനിമയിലെ മമ്മൂട്ടിയുടെ കഥാപാത്രം എന്നാണ് സൂചന. ഒരു അസുരാവതാരം തന്നെയായിരിക്കും അതെന്നാണ് റിപ്പോര്‍ട്ടുകള്‍. അല്‍പ്പം നെഗറ്റീവ് ഷേഡുള്ള നായകനായി മമ്മൂട്ടി കസറുമെന്നുതന്നെയാണ് ആരാധകര്‍ വിശ്വസിക്കുന്നത്.

‘കുഞ്ഞിരാമായണം’ എന്ന സിനിമയ്ക്ക് തിരക്കഥ ഒരുക്കിയ ദീപു പ്രദീപ്, ‘കോക്ക്ടെയില്‍’ എന്ന ജയസൂര്യ ചിത്രത്തിന് തിരക്കഥ ഒരുക്കിയ ശ്യം മേനോന്‍ എന്നിവരാണ് മമ്മൂട്ടി-മഞ്ജു ചിത്രത്തിന്റെ തിരക്കഥ. സംവിധായകന്‍ ജോഫിന്റേത് തന്നെയാണ് കഥ.