മമ്മൂട്ടിക്ക് ദിലീപ് എതിരാളി, പുത്തന്‍‌പണം ആദ്യദിവസം 2.42 കോടി!

ദി ഗ്രേറ്റ്ഫാദറിന്‍റെ ആദ്യദിന റെക്കോര്‍ഡ് തകര്‍ക്കാന്‍ മമ്മൂട്ടിയുടെ പുതിയ ചിത്രമായ പുത്തന്‍‌പണത്തിന് കഴിഞ്ഞില്ല. ആദ്യദിനം പുത്തന്‍‌പണത്തിന്‍റെ കളക്ഷന്‍ 2.42 കോടി രൂപയാണ്. ഗ്രേറ്റ്ഫാദറിന് 4.40 കോടി രൂപയോളമായിരുന്നു ആദ്യ ദിവസത്തെ കളക്ഷന്‍. 

എന്നാല്‍ പുത്തന്‍‌പണത്തെ സംബന്ധിച്ച് ഇത് വലിയ നേട്ടമാണ്. താരതമ്യേന ബജറ്റ് കുറഞ്ഞ ചിത്രം. ഇതേനിലയില്‍ പോയാല്‍ മൂന്നാം ദിവസം ചിത്രം ലാഭമാകും. ഗ്രേറ്റ്ഫാദര്‍ പോലെ ഒരു ബ്രഹ്മാണ്ഡഹിറ്റ് തിയേറ്ററുകളില്‍ നിറഞ്ഞ് പ്രദര്‍ശിപ്പിച്ചുകൊണ്ടിരിക്കെ ഇതുപോലെ മിന്നുന്ന പ്രകടനം നടത്താന്‍ പുത്തന്‍‌പണത്തിന് കഴിഞ്ഞത് ആ സിനിമയുടെ കരുത്ത് കാരണമാണെന്നാണ് ട്രേഡ് അനലിസ്റ്റുകള്‍ വിലയിരുത്തുന്നത്.

അതേസമയം, ഹനീഫ് അദേനി സംവിധാനം ചെയ്ത ദി ഗ്രേറ്റ്ഫാദര്‍ 50 കോടി ക്ലബിലേക്ക് പ്രവേശിക്കുകയാണ്. വരുന്ന ശനിയാഴ്ചയോ ഞായറാഴ്ചയോ ചിത്രം 50 കോടി ക്ലബിലെത്തുമെന്നാണ് പ്രതീക്ഷ. മമ്മൂട്ടിയുടെ കരിയറിലെ ഏറ്റവും മികച്ച വിജയമായി ചിത്രം മാറിക്കഴിഞ്ഞു.

അപ്രതീക്ഷിത മുന്നേറ്റവുമായി ദിലീപ് ചിത്രം ജോര്‍ജ്ജേട്ടന്‍സ് പൂരം മമ്മൂട്ടിച്ചിത്രങ്ങള്‍ക്ക് എതിരാളിയാവുന്ന കാഴ്ചയ്ക്കും ബോക്സോഫീസ് സാക്‍ഷ്യം വഹിക്കുന്നു. ആദ്യദിനങ്ങളില്‍ സമ്മിശ്രപ്രതികരണം നേടിയ സിനിമ ഇപ്പോള്‍ ഫുള്‍ ഹൌസിലാണ് കൂടുതല്‍ കേന്ദ്രങ്ങളിലും പ്രദര്‍ശിപ്പിക്കുന്നത്. ജോര്‍ജ്ജേട്ടന്‍സ് പൂരം മുതല്‍മുടക്ക് തിരിച്ചുപിടിച്ച് സൂപ്പര്‍ഹിറ്റിലേക്ക് നീങ്ങുകയാണ്. കുടുംബപ്രേക്ഷകര്‍ കൂടുതലായി എത്തിത്തുടങ്ങിയതോടെ ജോര്‍ജ്ജേട്ടന് ലോംഗ് റണ്ണും ഉറപ്പായി.