മോഹന്‍ലാലിന്‍റെ അടുത്ത 100 കോടി പ്രതീക്ഷ ‘വില്ലന്‍’, ചിത്രത്തില്‍ വിശാല്‍ ഡോക്ടര്‍ !

ബി ഉണ്ണികൃഷ്ണന്‍ സംവിധാനം ചെയ്യുന്ന മോഹന്‍ലാല്‍ ചിത്രം ‘വില്ലന്‍’ ഉടന്‍ പ്രദര്‍ശനത്തിനെത്തും. ചിത്രത്തിന്‍റെ പോസ്റ്റ് പ്രൊഡക്ഷന്‍ ജോലികള്‍ പുരോഗമിക്കുകയാണ്. മഞ്ജു വാര്യര്‍ മോഹന്‍ലാലിന്‍റെ നായികയാകുന്ന ഈ സിനിമ ഒരു റിവഞ്ച് ഡ്രാമയാണെന്നാണ് ആദ്യ സൂചന.

മോഹന്‍ലാലും വിശാലും നേര്‍ക്കുനേര്‍ നില്‍ക്കുന്ന ചിത്രം ഉള്‍പ്പെടുത്തിയ വില്ലന്‍റെ പോസ്റ്റര്‍ അണിയറ പ്രവര്‍ത്തകര്‍ പുറത്തുവിട്ടിരിക്കുകയാണ്. ചിത്രത്തില്‍ മോഹന്‍ലാലിന്‍റെ വില്ലനാണ് വിശാല്‍. ഹന്‍സിക, തെലുങ്ക് താരം ശ്രീകാന്ത്, റാഷി ഖന്ന തുടങ്ങിയവരും വില്ലനിലെ പ്രധാന താരങ്ങളാണ്.

വിശാല്‍ ഈ സിനിമയില്‍ ഒരു ഡോക്ടറായാണ് അഭിനയിക്കുന്നത് എന്നാണ് സൂചന. ചിത്രത്തില്‍ വിശാലിന് രണ്ട് ലുക്കുകള്‍ ഉണ്ടാവും. ഒരു മെഡിക്കല്‍ ത്രില്ലര്‍ ആയിരിക്കും സിനിമയെന്ന് പ്രവചനമുണ്ട്.

മാത്യു മാഞ്ഞൂരാന്‍ എന്ന പൊലീസ് ഉദ്യോഗസ്ഥനായാണ് മോഹന്‍ലാല്‍ വില്ലനില്‍ അഭിനയിക്കുന്നത്. മോഹന്‍ലാലിനും രണ്ട് ലുക്കുകളാണ് ചിത്രത്തില്‍ ഉള്ളത്. 

മനോജ് പരമഹംസ ഛായാഗ്രഹണം നിര്‍വഹിക്കുന്ന വില്ലന്‍ 8കെ റെസല്യൂഷനിലാണ് ചിത്രീകരിച്ചിരിക്കുന്നത്. റോക്‍ലൈന്‍ വെങ്കിടേഷ് നിര്‍മ്മിക്കുന്ന വില്ലന്‍ മലയാളത്തിന്‍റെ അടുത്ത 100 കോടി പ്രതീക്ഷയാണ്.