ദീപാവലി റിലീസാണ് ഷങ്കര്‍ - രജനികാന്ത് ടീമിന്‍റെ ബ്രഹ്മാണ്ഡചിത്രം 2.0 എന്ന് എല്ലാവര്‍ക്കും അറിയും. എന്തിരന്‍റെ രണ്ടാം ഭാഗമായ ഈ സിനിമ ഇപ്പോള്‍ തന്നെ 110 കോടി രൂപ നേടിക്കഴിഞ്ഞു എന്നറിയുമ്പോഴോ? അതേ, സത്യമാണത്.
ഈ സിനിമയുടെ സാറ്റലൈറ്റ് അവകാശം സീ ടിവിക്ക് 110 കോടി രൂപയ്ക്കാണ് വിറ്റിരിക്കുന്നത്. ചിത്രത്തിന്‍റെ തമിഴ്, തെലുങ്ക്, ഹിന്ദി പതിപ്പുകളുടെ സാറ്റലൈറ്റ് അവകാശം 15 വര്‍ഷത്തേക്കാണ് സീ ടിവിക്ക് നല്‍കിയത്. ഇത് ഒരു ഇന്ത്യന്‍ സിനിമയ്ക്ക് ലഭിക്കുന്ന ഏറ്റവും ഉയര്‍ന്ന സാറ്റലൈറ്റ് തുകയാണ്.
ആമിര്‍ഖാന്‍റെ ദംഗല്‍ 75 കോടി രൂപയ്ക്കാണ് സീ ടിവി തന്നെ സ്വന്തമാക്കിയത്. എസ് എസ് രാജമൌലിയുടെ ബാഹുബലി: ദി കണ്‍ക്ലൂഷന്‍ സോണി എന്‍റര്‍ടെയ്‌ന്‍‌മെന്‍റ് വാങ്ങിയത് 51 കോടി രൂപയ്ക്കാണ്.
ലൈക പ്രൊഡക്ഷന്‍സാണ് 450 കോടി രൂപ ചെലവില്‍ 2.0 നിര്‍മ്മിക്കുന്നത്. രജനികാന്തിനെ കൂടാതെ അക്ഷയ്കുമാര്‍, എമി ജാക്സണ്‍, സുധാംശു പാണ്ഡെ, കലാഭവന്‍ ഷാജോണ്‍, ആ‍ദില്‍ ഹുസൈന്‍, റിയാസ് ഖാന്‍ തുടങ്ങിയവരും 2.0ല്‍ താരങ്ങളാണ്.
നിരവ് ഷാ ഛായാഗ്രഹണം നിര്‍വഹിക്കുന്ന സിനിമയുടെ എഡിറ്റിംഗ് ആന്‍റണിയാണ്. ഹോളിവുഡ് ആക്ഷന്‍ ഡയറക്ടര്‍ കെന്നി ബേറ്റ്സ് ആണ് ചിത്രത്തിലെ സ്റ്റണ്ട് രംഗങ്ങള്‍ ഒരുക്കിയിരിക്കുന്നത്.
എ ആര്‍ റഹ്‌മാന്‍ സംഗീതം നിര്‍വഹിക്കുന്ന സിനിമയുടെ സൌണ്ട് ഡിസൈന്‍ റസൂല്‍ പൂക്കുട്ടി.