ഇന്‍ഡോര്‍ ഹോല്‍ക്കര്‍ സ്റ്റേഡിയം ഇന്നും ഇന്ത്യയ്ക്കായി കളമൊരുക്കി. പരമ്പരയിലെ ഏറ്റവും മികച്ച സ്കോര്‍ നേടിയാണ് ഇത്തവണ ഓസീസ് ഇന്ത്യയെ വെല്ലുവിളിച്ചത്. എന്നാല്‍, കോഹ്‌ലിയുടെ ചുണക്കുട്ടികള്‍ ലളിതമായ ബാറ്റിങ്ങിലൂടെ ആ വെല്ലുവിളി മറികടന്ന ഇന്ത്യയ്ക്ക് ഹാട്രിക്ക് വിജയത്തോടെ പരമ്പര.
ടോസ് നേടി ആദ്യം ബാറ്റു ചെയ്ത ഓസ്ട്രേലിയ നിശ്ചിത 50 ഓവറിൽ 293 റണ്‍സെടുത്തു. ആറു വിക്കറ്റ് നഷ്ടത്തില്‍ 293 റണ്‍സെടുത്ത ഓസീസിനു ആത്മവിശ്വാസമുണ്ടായിരുന്നു. എന്നാല്‍, പിന്നാലെ വന്ന കോഹ്‌ലിപ്പട ആ വിശ്വാസം തുടക്കത്തില്‍ തന്നെ തകര്‍ത്തു. 13 പന്തുകൾ ബാക്കി നിൽക്കെ അഞ്ചു വിക്കറ്റ് മാത്രം നഷ്ടത്തിൽ ഇന്ത്യ ലക്ഷ്യം കണ്ടു. വിജയം അഞ്ചു വിക്കറ്റിന്.
ഇന്ത്യയുടെ ഓപ്പണര്‍മാരായ രോഹിത് ശര്‍മ (71), അജിങ്ക്യ രഹാനെ (70), ഹാര്‍ദിക് പാണ്ഡ്യ (78) എന്നിവരുടെ അര്‍ധസെഞ്ചുറികള്‍ ഓസീസിന്റെ നെഞ്ചത്തായിരുന്നു പതിച്ചത്. ഈ വിജയത്തോടെ തുടർച്ചയായ ആറാം പരമ്പര ജയമാണ് ഇന്ത്യ ഉറപ്പിച്ചിരിക്കുന്നത്. തുടര്‍ച്ചയായി പരാജയത്തിന്റെ രുചി അറിയുകയാണ് ഓസീസ്.