വിരാട് കോഹ്ലിക്ക് അപ്രതീക്ഷിതമായി ലഭിച്ച ഒരു വിവാഹ വാഗ്ദാനമാണ് ഇപ്പോള്‍ സോഷ്യല്‍ മീഡിയയില്‍ വൈറലായികൊണ്ടിരിക്കുന്നത്. പാക്കിസ്ഥാനില്‍ നിന്നുള്ള ഒരു പൊലീസുകാരനായിരുന്നു കോഹ്ലിയോട് വിവാഹ അഭ്യര്‍ഥന നടത്തി രംഗത്തെത്തിയത്.
പാക്കിസ്ഥാനില്‍ അടുത്തിടെ നടന്ന ഇന്‍ഡിപെന്‍ഡന്‍സ് കപ്പ് ടൂര്‍ണമെന്റിനിടെയാണ് പൊലീസുകാരന്റെ അമ്പരപ്പിക്കുന്ന വിവാഹാഭ്യര്‍ഥന. വലിയ ബാനറില്‍ കോഹ്ലി... എന്നെ വിവാഹം കഴിക്കാമോ ? എന്ന് എഴുതി ഇയാള്‍ ഉയര്‍ത്തിക്കാണിച്ചത്.
ഐസിസി ലോക ഇലവന്‍ ടീമില്‍ കോഹ്ലിയും ധോണിയും ഇല്ലാത്തത് പാക്കിസ്ഥാന്‍ ആരാധകരെ നിരാശരാക്കിയിരുന്നു. ഇരുവരെയും മിസ് ചെയ്യുന്നതായി കാട്ടിയുള്ള പാക് ആരാധകരുടെ ബാനറുകളും സോഷ്യല്‍ മീഡിയയില്‍ പ്രചരിക്കുന്നുണ്ട്.
നേരത്തെ ഇംഗ്ലണ്ടിന്റെ വനിതാ ക്രിക്കറ്റ് താരം ഡാനിയേല കോഹ്ലിയോട് വിവാഹാഭ്യര്‍ഥന നടത്തിയത് ഏറെ ശ്രദ്ധിക്കപ്പെട്ടിരുന്നു. അടുത്തിടെ കോഹ്ലി ഡാനിയേലയ്ക്ക് ഒരു ബാറ്റ് സമ്മാനമായി നല്‍കുകയും ചെയ്തു. അതേസമയം, ബോളിവുഡ് നടി അനുഷ്‌ക ശര്‍മയുമായി കോഹ്ലി ഏറെനാളായി പ്രണയത്തിലുമാണ്.