ആദ്യ ഇലവനിൽ സഞ്ജുവും, ഓപ്പണിങ്ങിൽ ധവാനൊപ്പം പൃഥ്വി ഷാ: ശ്രീലങ്കക്കെതിരായ ഇന്ത്യൻ ഇലവരെ തിരെഞ്ഞെടുത്ത് ഹർഷ ഭോഗ്ലെ

ജൂലൈയിൽ നടക്കാനിരിക്കുന്ന ശ്രീലങ്കൻ പര്യടനത്തിൽ രണ്ടാം നിര ടീമിനെയാകും ഇന്ത്യ കളിക്കാനിറക്കുക എന്ന വാർത്ത ആവേശത്തോടെയാണ് ഇന്ത്യൻ ആരാധകർ സ്വീകരിച്ചത്. സീനിയർ താരങ്ങൾ ഈ സമയത്ത് ഇംഗ്ലണ്ട് പര്യടനത്തിലായിരിക്കും എന്നതിനാലാണ് തീരുമാനം. ഇന്ത്യയുടെ സൂപ്പർ താരങ്ങൾ ഇല്ലാതെ ടീം ശ്രീലങ്കക്കെതിരെ മത്സരിക്കുമ്പോൾ ആ ടീമിൽ ആരെല്ലാം ഉൾപ്പെടുമെന്ന ആകാംക്ഷയിലാണ് ആരാധകർ.

ഇന്ത്യയുടെ മുൻകാലതാരങ്ങൾ തങ്ങളുടെ ഇലവൻ ആരെല്ലാമെന്ന് പ്രവചിച്ചിരുന്നുവെങ്കിലും പ്രമുഖ ക്രിക്കറ്റ് കമന്റേറ്ററായ ഹർഷാ ഭോഗ്ലെയുടെ ഇലവനാണ് ഇപ്പോൾ ചർച്ചയായിരിക്കുന്നത്. ശ്രീലങ്കക്കെതിരായ പരമ്പരയിൽ സീനിയർ താരം ശിഖർ ധവാനും പൃഥ്വി ഷായും ഓപ്പൺ ചെയ്യണമെന്നാണ് ഭോഗ്ലെ പറയുന്നത്. മൂന്നാമനായി സൂര്യകുമാർ യാദവും നാലാമനായി മലയാളി താരം സഞ്ജു സാംസണുമാണ് ടീമിൽ.

ഹാർദ്ദിക് പാണ്ഡ്യ,കൃണാൽ പാണ്ഡ്യ,രാഹുൽ തേവാത്തിയ എന്നീ ഓൾറൗണ്ടർമാരും ഭുവനേശ്വർ കുമാർ,ദീപക് ചഹർ,വരുൺ ചക്രവർത്തി എന്നീ ബൗളർമാരും ടീമിലുണ്ട്. രാഹുൽ ചഹർ,യൂസ്വേന്ദ്ര ചഹൽ എന്നിവരിൽ ഒരാളും ടീമിൽ വേണമെന്നും ഭോഗ്ളെ പറയുന്നു. കഴിഞ്ഞ ദിവസം ക്രിക്ക്‌ബസുമായി നടന്ന അഭിമുഖത്തിനിടെയാണ് ഭോഗ്ലെ തന്റെ ഇലവൻ തിരെഞ്ഞെടുത്തത്