ടി20 ലോകകപ്പിന് മുൻപ് റാങ്കിംഗ് പ്രഖ്യാപിച്ച് ഐസിസി, ടി20 ബാറ്റർമാരുടെ ആദ്യ പത്തിൽ രണ്ട് ഇന്ത്യൻ താരങ്ങൾ

ടി20 ലോകകപ്പിന് തൊട്ടുമുന്‍പ് ഐസിസി ടി20 ബാറ്റിംഗ് റാങ്കുകള്‍ പുറത്തുവിട്ട് ഐസിസി. 863 റേറ്റിംഗ് പോയന്റുകളോടെ ഇന്ത്യന്‍ സൂപ്പര്‍ താരം സൂര്യകുമാര്‍ യാദവാണ് പട്ടികയില്‍ ഒന്നാമതുള്ളത്.788 പോയന്റുകളുമായി ഇംഗ്ലണ്ട് ഓപ്പണര്‍ ഫില്‍ സാള്‍ട്ടാണ് രണ്ടാം സ്ഥാനത്ത്. മുഹമ്മദ് റിസ്വാന്‍, എയ്ഡന്‍ മാര്‍ക്രം എന്നിവര്‍ ആദ്യ അഞ്ചില്‍ സ്ഥാനം നിലനിര്‍ത്തിയപ്പോള്‍ ഇന്ത്യന്‍ ഓപ്പണറായ യശ്വസി ജയ്‌സ്വാള്‍ പട്ടികയില്‍ ആറാം സ്ഥാനത്ത് ഇടം പിടിച്ചു. സൂര്യകുമാറിന് പുറമെ ആദ്യ പത്ത് റാങ്കിംഗില്‍ ഇടമുള്ള ഏക ഇന്ത്യന്‍ താരമാണ് ജയ്‌സ്വാള്‍.

ലോകകപ്പ് ടീമില്‍ ഇടം നേടാനാവാതെ പോയ റുതുരാജ് ഗെയ്ക്ക്വാദ് പട്ടികയില്‍ പതിനൊന്നാം സ്ഥാനത്താണ്. റിങ്കു സിംഗ്(32), വിരാട് കോലി(47), രോഹിത് ശര്‍മ(52),ശിവം ദുബെ(71),ഹാര്‍ദ്ദിക് പാണ്ഡ്യ(74) എന്നിവരാണ് ലോകകപ്പ് ടീമിലുള്ള ഇന്ത്യന്‍ താരങ്ങളുടെ റാങ്കിംഗ്. വിക്കറ്റ് കീപ്പര്‍ ബാറ്ററായ സഞ്ജു സാംസണ്‍ ആദ്യ നൂറ് റാങ്കിംഗിലില്ല. ബൗളിംഗ് റാങ്കിംഗില്‍ ഇംഗ്ലണ്ടിന്റെ ആദില്‍ റഷീദാണ് ഒന്നാം സ്ഥാനത്ത്. ഇന്ത്യന്‍ ഓള്‍റൗണ്ടറായ അക്ഷര്‍ പട്ടേല്‍ മൂന്നാം സ്ഥാനത്താണ്. ജസ്പ്രീത് ബുമ്രയ്ക്ക് ആദ്യ നൂറ് റാങ്കിംഗില്‍ ഇടം നേടാനായില്ല. ടി20 ടീം റാങ്കിംഗില്‍ 264 പോയന്റുമായി ഇന്ത്യയാണ് ഒന്നാം സ്ഥാനത്ത്. 257 പോയന്റുമായി ഓസ്‌ട്രേലിയ രണ്ടാമതും 252 പോയന്റുമായി നിലവിലെ ചാമ്പ്യന്മാരായ ഇംഗ്ലണ്ട് മൂന്നാം സ്ഥാനത്തുമാണ്.