ഇന്ത്യ മികച്ച ടീം, തോൽപ്പിക്കുക ബുദ്ധിമുട്ടെന്ന് സ്റ്റീവ് സ്മിത്ത്

ഇന്ത്യയും ഓസ്‌ട്രേലിയയും തമ്മില്‍ ഏറ്റുമുട്ടുന്ന ബോര്‍ഡര്‍- ഗവാസ്‌കര്‍ ട്രോഫിക്കായുള്ള കാത്തിരിപ്പിലാണ് ക്രിക്കറ്റ് ആരാധകര്‍. നവംബര്‍ 22 മുതല്‍ ജനുവരി 7 വരെ നടക്കുന്ന അഞ്ച് ടെസ്റ്റ് മത്സരങ്ങളടങ്ങിയ പരമ്പര ഇത്തവണയും ആവേശകരമാകുമെന്ന് ഉറപ്പാണ്. ഓസ്‌ട്രേലിയന്‍ മണ്ണില്‍ ഹാട്രിക് പരമ്പര നേട്ടമാണ് ഇന്ത്യ ലക്ഷ്യമിടുന്നതെങ്കില്‍ നീണ്ട 10 വര്‍ഷങ്ങള്‍ക്ക് ശേഷം ട്രോഫി സ്വന്തമാക്കാനാണ് ഓസ്‌ട്രേലിയയുടെ ശ്രമം.

ഇപ്പോഴിതാ ബോര്‍ഡര്‍- ഗവാസ്‌കര്‍ ട്രോഫിക്ക് മുന്നോടിയായി പ്രതികരിച്ചിരിക്കുകയാണ് ഓസീസ് സ്റ്റാര്‍ ബാറ്ററായ സ്റ്റീവ് സ്മിത്ത്. ഈ പരമ്പരയ്ക്കായി ഞാന്‍ വളരെ ആവേശത്തിലാണ്. മികച്ച ക്രിക്കറ്റാണ് ഇന്ത്യയും ഓസ്‌ട്രേലിയയും കളിക്കുന്നത്. കഴിഞ്ഞ 2 വര്‍ഷമായി ഇന്ത്യയെ തോല്‍പ്പിക്കാന്‍ ഞങ്ങള്‍ക്കായിട്ടില്ല. ഞങ്ങള്‍ ഇന്ത്യയില്‍ കളിച്ചപ്പോഴും മികച്ച പ്രകടനമാണ് അവര്‍ നടത്തിയത്. ഇന്ത്യയെ നാട്ടില്‍ തോല്‍പ്പിക്കുക എളുപ്പമല്ലെന്ന് ഞങ്ങള്‍ക്കറിയാം. ഈ പരമ്പരയും ആവേശകരമായിരിക്കുമെന്ന് ഉറപ്പാണ്. അതിനായാണ് ഞാന്‍ കാത്തിരിക്കുന്നത്. സ്റ്റാര്‍ സ്‌പോര്‍ട്‌സിനോട് സംസാരിക്കവെ സ്മിത്ത് പറഞ്ഞു.

ബോര്‍ഡര്‍ ഗവാസ്‌കര്‍ ട്രോഫിയില്‍ 18 മത്സരങ്ങളിലെ 35 ഇന്നിങ്ങ്‌സുകളില്‍ നിന്നും 1887 റണ്‍സാണ് സ്മിത്ത് നേടിയിട്ടുള്ളത്. 8 സെഞ്ചുറികളും 5 അര്‍ധസെഞ്ചുറികളും ഇതില്‍ ഉള്‍പ്പെടുന്നു. ഇത്തവണയും ഓസ്‌ട്രേലിയന്‍ പ്രതീക്ഷകള്‍ സ്മിത്തിന്റെ ബാറ്റിംഗിനെ ആശ്രയിച്ചാണ് ഇരിക്കുന്നത്.കഴിഞ്ഞ 2 തവണയും സ്വന്തം നാട്ടില്‍ പരാജയപ്പെട്ട ഓസ്‌ട്രേലിയ ഹാട്രിക് തോല്‍വി എന്ന നാണക്കേട് ഒഴിവാക്കാന്‍ വേണ്ടി കൂടിയാകും ഇത്തവണ കളത്തിലിറങ്ങുക.