അടിച്ചു കയറി ജോസേട്ടന്‍, യുഎസിനെതിരെ തുടരെ അഞ്ച് കൂറ്റന്‍ സിക്‌സുകള്‍, സെമിയിലേക്കുള്ള ഇംഗ്ലണ്ടിന്റെ പ്രവേശനം രാജകീയം

ടി20 ലോകകപ്പ് സൂപ്പര്‍ എട്ടിലെ നിര്‍ണായക മത്സരത്തില്‍ അമേരിക്കയെ 10 വിക്കറ്റിന് തകര്‍ത്ത് നിലവിലെ ചാമ്പ്യന്മാരായ ഇംഗ്ലണ്ട് സെമിയില്‍ പ്രവേശിച്ചു. പന്തുകൊണ്ട് ജോര്‍ദാനും ബാറ്റ് കൊണ്ട് നായകന്‍ ജോസ് ബട്ട്ലറും നടത്തിയ അവിസ്മരണീയമായ പ്രകടനങ്ങളാണ് ഇംഗ്ലണ്ടിന് വിജയം സമ്മാനിച്ചത്. 38 പന്തില്‍ 7 സിക്‌സുകളുടെയും 6 ഫോറുകളുടെയും സഹായത്തോടെ 83 റണ്‍സാണ് ബട്ട്ലര്‍ സ്വന്തമാക്കിയത്. ബട്ട്ലറുടെ വെടിക്കെട്ട് പ്രകടനത്തിന്റെ മികവില്‍ യുഎസ് ഉയര്‍ത്തിയ 115 റണ്‍സ് വിജയലക്ഷ്യം 9.4 ഓവറിലാണ് ഇംഗ്ലണ്ട് മറികടന്നത്.

ടോസ് നഷ്ടപ്പെട്ട് ആദ്യം ബാറ്റ് ചെയ്ത യുഎസിന്റെ 4 വിക്കറ്റുകള്‍ വീഴ്ത്തിയ ക്രിസ് ജോര്‍ദാനാണ് യുഎസിനെ ചെറിയ സ്‌കോറില്‍ പുറത്താക്കാന്‍ സഹായിച്ചത്. അവസാന ഓവറില്‍ ഹാട്രിക് ഉള്‍പ്പടെ 4 വിക്കറ്റുകള്‍ വീഴ്ത്തി യുഎസ് വാലറ്റത്തെ എറിഞ്ഞിട്ടത് ജോര്‍ദാനായിരുന്നു. അതേസമയം യുഎസ് ഉയര്‍ത്തിയ സ്‌കോറിലേക്ക് ജോസേട്ടന്റെ ടര്‍ബോ എഞ്ചിനുമായാണ് ഇംഗ്ലണ്ട് കുതിച്ചത്. അര്‍ധസെഞ്ചുറി സ്വന്തമാക്കിയതിന് ശേഷം യുഎസ് സ്‌കോറിനരികെ നില്‍ക്കെ തുടര്‍ച്ചയായി 5 സിക്‌സുകള്‍ പായിച്ചാണ് ജോസ് ബട്ട്ലര്‍ ഇംഗ്ലണ്ട് ചേയ്‌സിംഗ് അനായാസകരമാക്കിയത്. ഫില്‍ സാള്‍ട്ട് 21 പന്തില്‍ 25 റണ്‍സുമായി പുറത്താകാതെ നിന്നു.