കുഞ്ഞൻ ടീമുകൾക്കെതിരെ ഭീകരൻ, നിലവാരമുള്ള ടീമിന് മുന്നിൽ മുട്ടിടിക്കും : ലോകകപ്പിലെ കെ എൽ രാഹുലിൻ്റെ പ്രകടനം ഇങ്ങനെ

ടി20 ലോകകപ്പിൽ ഇന്ത്യയുടെ ഓരോ മത്സരം കഴിയും തോറും വലിയ വിമർശനമാണ് ഇന്ത്യൻ ഓപ്പണർ കെ എൽ രാഹുലിന് നേരെ ഉയർന്നത്. എഷ്യാക്കപ്പിലെ മോശം പ്രകടനം ലോകകപ്പിലും രാഹുൽ ആവർത്തിച്ചതോടെ ഇന്ത്യയുടെ ലോകകപ്പ് പ്രതീക്ഷകളെ തന്നെ മോശമായി ബാധിച്ചു. 2022ലെ ലോകകപ്പിൽ 2 അർധസെഞ്ചൂറികൾ കണ്ടെത്തിയെങ്കിലും മുൻനിര ടീമുകൾക്കെതിരെ രാഹുലിൻ്റെ പ്രകടനം ദയനീയമായിരുന്നു. 

2021ലെ  ടി20 ലോകകപ്പിലും താരത്തിൻ്റെ പ്രകടനം വ്യത്യസ്തമായിരുന്നില്ലെന്ന് കണക്കുകൾ കാണിക്കുന്നു. ഈ ലോകകപ്പിലും കഴിഞ്ഞ ലോകകപ്പിലും കുഞ്ഞൻ ടീമുകൾക്കെതിരെ മാത്രമാണ് കെ എൽ രാഹുലിൻ്റെ ബാറ്റ് ശബ്ദിച്ചത്. ഈ ലോകകപ്പിൽ  പാകിസ്ഥാനെതിരെ 8 പന്തിൽ 4, ദക്ഷിണാഫ്രിക്കക്കെതിരെ 14 പന്തിൽ 9, നെതർലൻഡ്സിനെതിരെ 12 പന്തിൽ 9, ഇംഗ്ലണ്ടിനെതിരെ 5 പന്തിൽ 5 എന്നിങ്ങനെ മോശം സ്കോറിൽ രാഹുൽ പുറത്തായപ്പോൾ ബംഗ്ലാദേശിനെതിരെയും സിംബാബ്‌വെയ്ക്കെതിരെയും രാഹുൽ അർധസെഞ്ചുറി കണ്ടെത്തി.

2021ലെ ലോകകപ്പിൽ പാകിസ്ഥാനെതിരെ 8 പന്തിൽ 3, ന്യൂസിലൻഡിനെതിരെ 16 പന്തിൽ 19 എന്നിങ്ങനെയായിരുന്നു രാഹുലിൻ്റെ പ്രകടനം. കുഞ്ഞൻ ടീമുകളായ അഫ്ഗാനിസ്ഥാൻ, സ്കോട്ട്‌ലൻഡ്, നമീബിയ എന്നിവർക്കെതിരെ രാഹുൽ അന്ന് അർധസെഞ്ചുറി കണ്ടെത്തുകയും ചെയ്തു. 69,50,54* എന്നിങ്ങനെയായിരുന്നു ഈ ടീമുകൾക്കെതിരെ രാഹുലിൻ്റെ അന്നത്തെ പ്രകടനം.