'വായ അടയ്ക്കൂ, അവനെ കളിയാക്കരുത്'; നവീന്‍ ഉള്‍ ഹഖിനെ പരിഹസിച്ച ഇന്ത്യന്‍ ആരാധകരോട് കോലി (വീഡിയോ)

ബൗണ്ടറി ലൈനില്‍ ഫീല്‍ഡ് ചെയ്യുകയായിരുന്ന നവീന്‍ ഉള്‍ ഹഖിനെ ഇന്ത്യന്‍ ആരാധകര്‍ പരിഹസിക്കാന്‍ ശ്രമിച്ചപ്പോള്‍ ഇടപെട്ടത് കോലി തന്നെ

ഐപിഎല്ലിനിടെ കൊമ്പുകോര്‍ത്ത വിരാട് കോലിയും നവീന്‍ ഉള്‍ ഹഖും ഏറ്റുമുട്ടുമ്പോള്‍ എന്ത് സംഭവിക്കും? ലോകകപ്പിലെ ഇന്ത്യ-അഫ്ഗാനിസ്ഥാന്‍ മത്സരത്തിനായി ആരാധകര്‍ കാത്തിരുന്നത് ഈ നിമിഷത്തിനു വേണ്ടിയായിരുന്നു. അഫ്ഗാന്‍ പേസര്‍ നവീന്‍ ഉള്‍ ഹഖിനെ കോലി സിക്സര്‍ പറത്തുമെന്ന് ഇന്ത്യന്‍ ആരാധകരും കോലിയുടെ കുറ്റി തെറിപ്പിച്ച് നവീന്‍ പ്രഹരമേല്‍പ്പിക്കുമെന്ന് അഫ്ഗാന്‍ ആരാധകരും സോഷ്യല്‍ മീഡിയയില്‍ വെല്ലുവിളിച്ചു. എന്നാല്‍ ഇരുവരും തമ്മിലുള്ള സൗഹൃദ നിമിഷങ്ങളാണ് ആരാധകരെ കാത്തിരുന്നത്.