12 വർഷത്തിനിടെ ഇന്ത്യയിൽ സെഞ്ചുറി നേടുന്ന ആദ്യ കിവീസ് താരം, റെക്കോർഡ് നേട്ടം സ്വന്തമാക്കി രചിൻ

Rachin ravindra

ഇന്ത്യക്കെതിരായ ഒന്നാം ടെസ്റ്റ് മത്സരത്തിലെ സെഞ്ചുറിയോടെ റെക്കോര്‍ഡ് നേട്ടം കുറിച്ച് ഇന്ത്യന്‍ വംശജനായ ന്യൂസിലന്‍ഡ് താരം രചിന്‍ രവീന്ദ്ര. മത്സരത്തിലെ മൂന്നാം ദിനത്തില്‍ സെഞ്ചുറി സ്വന്തമാക്കിയ രചിന്‍ 12 വര്‍ഷത്തിനിടെ ഇന്ത്യയില്‍ സെഞ്ചുറി സ്വന്തമാക്കുന്ന ആദ്യ ന്യൂസിലന്‍ഡ് ബാറ്ററാണ്.

 മൂന്നാം ദിനം ന്യൂസിലന്‍ഡ് ആക്രമണത്തിന് ചുക്കാന്‍ പിടിച്ചത് രചിനായിരുന്നു. 157 പന്തുകളില്‍ നിന്നും 4 സിക്‌സും 13 ഫോറുമടക്കം 134 റണ്‍സാണ് രചിന്‍ സ്വന്തമാക്കിയത്. രചിന്റെ മികവില്‍ ഒന്നാം ഇന്നിങ്ങ്‌സില്‍ 402 റണ്‍സിലെത്താന്‍ ന്യൂസിലന്‍ഡിന് സാധിച്ചു. ഇതോടെ ഇന്ത്യയ്‌ക്കെതിരെ 356 റണ്‍സിന്റെ കൂറ്റന്‍ ലീഡ് മുന്നോട്ട് വെയ്ക്കാനും ന്യൂസിലന്‍ഡിനായി. ന്യൂസിലന്‍ഡിലെ വെല്ലിങ്ങ്ടണില്‍ താമസക്കാരനായ രചിന്റെ കുടുംബവേരുകള്‍ ബെംഗളുരുവിലാണ്. ചിന്നസ്വാമിയില്‍ 2023ലെ ഏകദിന ലോകകപ്പില്‍ രചിന്‍ പാകിസ്ഥാനെതിരെ സെഞ്ചുറി നേടിയിരുന്നു. ഇതിന് മുന്‍പ് റോസ് ടെയ്ലറാണ് ഇന്ത്യന്‍ മണ്ണില്‍ ടെസ്റ്റ് സെഞ്ചുറി നേടിയ ന്യൂസിലന്‍ഡ് ബാറ്റര്‍. ടെയ്ലറുടെ സെഞ്ചുറിയും ബെംഗളുരുവില്‍ തന്നെയായിരുന്നു.