വെസ്റ്റിൻഡീസിൽ സഞ്ജുവിനെ കാത്ത് അപൂർവനേട്ടം, പട്ടികയിൽ രോഹിത്തിനും കോലിയ്ക്കുമൊപ്പം ഇടം നേടാം

വെസ്റ്റിന്‍ഡീസിനെതിരായ ടി20 പരമ്പരയ്‌ക്കൊരുങ്ങുന്ന മലയാളിതാരം സഞ്ജു സാംസണെ കാത്ത് തകര്‍പ്പന്‍ റെക്കോര്‍ഡ്. ടി20യില്‍ 6000 റണ്‍സെന്ന നേട്ടമാണ് വിന്‍ഡീസില്‍ സഞ്ജുവിനെ കാത്തിരിക്കുന്നത്. ഐപിഎല്ലിലും ആഭ്യന്തര ക്രിക്കറ്റിലും ഇന്ത്യന്‍ ടീമിലുമായി 5979 റണ്‍സാണ് നിലവില്‍ സഞ്ജുവിന്റെ പേരിലുള്ളത്. 21 റണ്‍സ് കൂടി സ്വന്തമാക്കാനായാല്‍ 6000 ടി20 റണ്‍സെന്ന നേട്ടത്തിലെത്താന്‍ സഞ്ജുവിനാകും.

12 ഇന്ത്യന്‍ താരങ്ങളാണ് സഞ്ജുവിന് മുന്‍പ് ഈ നേട്ടത്തിലെത്തിയിട്ടുള്ളത്. ഇന്ത്യന്‍ നായകന്‍ രോഹിത് ശര്‍മ, മുന്‍ നായകന്‍ വിരാട് കോലി,ശിഖര്‍ ധവാന്‍,സുരേഷ് റെയ്‌ന,റോബിന്‍ ഉത്തപ്പ, എം എസ് ധോനി,ദിനേഷ് കാര്‍ത്തിക്,കെ എല്‍ രാഹുല്‍,മനീഷ് പാണ്ഡെ,സൂര്യകുമാര്‍ യാദവ്,ഗൗതം ഗംഭീര്‍,അമ്പാട്ടി റായുഡു എന്നീ താരങ്ങളാണ് എന്നിവരാണ് ഈ നേട്ടത്തിലെത്തിയിട്ടുള്ള മറ്റ് ഇന്ത്യന്‍ താരങ്ങള്‍. യുവതാരങ്ങള്‍ ആരും തന്നെ പട്ടികയിലില്ല.

ഇതുവരെ 241 ടി20 മത്സരങ്ങളില്‍ നിന്നും 3 സെഞ്ചുറിയും 38 അര്‍ധസെഞ്ചുറിയും അടക്കമാണ് 5979 റണ്‍സ് സഞ്ജു സ്വന്തമാക്കിയത്. 28.60 ശരാശരിയില്‍ 133 സ്‌ട്രൈക്ക് റേറ്റിലാണ് സഞ്ജുവിന്റെ നേട്ടം. 119 റണ്‍സാണ് സഞ്ജുവിന്റെ ടി20യിലെ ഉയര്‍ന്ന സ്‌കോര്‍. അഞ്ച് ടി20 മത്സരങ്ങളടങ്ങിയ പരമ്പര ഓഗസ്റ്റ് മൂന്നിനാണ് ആരംഭിക്കുക. ജൂലൈ 27ന് ആരംഭിക്കുന്ന ഏകദിന പരമ്പരയിലും സഞ്ജുവുണ്ട്. 3 മത്സരങ്ങളാണ് ഈ പരമ്പരയില്‍ ഉള്ളത്.