Sanju Samson: ആ സമയത്ത് സഞ്ജു സെല്‍ഫിഷ് ആയി; ജയ്‌സ്വാളിന്റെ വിക്കറ്റ് നഷ്ടമായതില്‍ രാജസ്ഥാന്‍ നായകന് വിമര്‍ശനം (വീഡിയോ)

റാഷിദ് ഖാന്‍ എറിഞ്ഞ ആറാം ഓവറിലെ ആദ്യ പന്തിലായിരുന്നു സംഭവം

Sanju Samson: സഞ്ജു സാംസണ്‍ ഒരു നിമിഷത്തേക്ക് സെല്‍ഫിഷ് ആയി ചിന്തിച്ചതാണ് യശ്വസി ജയ്‌സ്വാളിന്റെ വിക്കറ്റ് നഷ്ടമാകാന്‍ കാരണമെന്ന് ആരാധകര്‍. ഗുജറാത്ത് ടൈറ്റന്‍സിനെതിരായ മത്സരത്തില്‍ ജയ്‌സ്വാളിന്റെ വിക്കറ്റ് നിര്‍ണായകമായി. ജയ്‌സ്വാളും സഞ്ജുവും ചേര്‍ന്ന് രാജസ്ഥാന്റെ സ്‌കോര്‍ ബോര്‍ഡ് മികച്ച രീതിയില്‍ ചലിപ്പിച്ചു കൊണ്ടിരിക്കുന്ന സമയത്താണ് ആ വിക്കറ്റ് നഷ്ടമാകുന്നത്. 

സിംഗിളിനായി ശ്രമിക്കുന്നതിനിടെ ഓപ്പണര്‍ യശ്വസി ജയ്സ്വാളാണ് റണ്‍ഔട്ടായത്. റാഷിദ് ഖാന്‍ എറിഞ്ഞ ആറാം ഓവറിലെ ആദ്യ പന്തിലായിരുന്നു സംഭവം. സ്ട്രൈക്കര്‍ എന്‍ഡിലുണ്ടായിരുന്ന സഞ്ജു തേര്‍ഡ് മാനിലേക്ക് കളിച്ച ഷോട്ട് അഭിനവ് മനോഹര്‍ മനോഹരമായ ഡൈവിങ്ങിലൂടെ തടുത്തിടുകയായിരുന്നു. സിംഗിള്‍ ലഭിക്കുമെന്ന് ആദ്യം കരുതിയ സഞ്ജു നോണ്‍ സ്ട്രൈക്കര്‍ എന്‍ഡിലുണ്ടായിരുന്ന ജയ്സ്വാളിനോട് ഓടാന്‍ ആവശ്യപ്പെടുകയും ചെയ്തു. എന്നാല്‍ പന്ത് ഫീല്‍ഡറുടെ കൈകളില്‍ ആണെന്ന് മനസ്സിലാക്കിയ സഞ്ജു പിന്നീട് സിംഗിള്‍ നിഷേധിക്കുകയായിരുന്നു. ഈ സമയം കൊണ്ട് ജയ്സ്വാള്‍ നോണ്‍ സ്ട്രൈക്കര്‍ എന്‍ഡില്‍ നിന്ന് ഓടി സ്ട്രൈക്കര്‍ എന്‍ഡിലേക്ക് എത്താറായി. പന്ത് കയ്യില്‍ കിട്ടിയ റാഷിദ് ഖാന്‍ ഉടനെ സ്റ്റംപ് ചെയ്തു. സഞ്ജു തിരിച്ച് ക്രീസില്‍ കയറിയതിനാല്‍ ജയ്സ്വാളിന് വിക്കറ്റ് നഷ്ടമാകുകയായിരുന്നു.