രോഹിത്തിനെയും കോലിയേയും ക്ലീൻ ബൗൾഡാക്കി, അപൂർവ്വ റെക്കോർഡ് സ്വന്തമാക്കി ഷഹീൻ ഷാ അഫ്രീദി

ഏഷ്യാകപ്പിലെ ഇന്ത്യയും പാകിസ്ഥാനും തമ്മിലുള്ള ആവേശപോരാട്ടത്തില്‍ ഇന്ത്യയെ എറിഞ്ഞിട്ടത് പാക് പേസര്‍ ഷഹീന്‍ ഷാ അഫ്രീദി. മത്സരത്തിന്റെ തുടക്കത്തില്‍ നായകന്‍ രോഹിത് ശര്‍മയെ ക്ലീന്‍ ബൗള്‍ഡാക്കികൊണ്ട് ഞെട്ടിച്ച ഷഹീന്‍ ഷാ പിന്നാലെ വിരാട് കോലിയേയും ബൗള്‍ഡാക്കി. ഏകദിനചരിത്രത്തില്‍ ഇതാദ്യമായാണ് ഒരു ഇന്നിങ്ങ്‌സില്‍ തന്നെ ഇന്ത്യയുടെ വിരാട് കോലിയെയും രോഹിത് ശര്‍മയേയും ഒരു ബൗളര്‍ ബൗള്‍ഡാക്കുന്നത്.

2017ലെ ചാമ്പ്യന്‍സ് ട്രോഫി ഫൈനലില്‍ കോലിയേയും രോഹിത്തിനെയും മുഹമ്മദ് ആമിര്‍ പുറത്താക്കിയിട്ടുണ്ടെങ്കിലും അന്ന് രോഹിത്തിനെ ആമിര്‍ വിക്കറ്റിന് മുന്നില്‍ കുടുക്കുകയായിരുന്നു. കോലിയാകട്ടെ മത്സരത്തില്‍ ക്യാച്ച് നല്‍കിയാണ് പുറത്തായത്. എന്നാല്‍ ഏഷ്യാകപ്പില്‍ ഇന്നലെ നടന്ന മത്സരത്തില്‍ മനോഹരമായ ഒരു ഇന്‍സ്വിങ്ങറിലൂടെയാണ് ഷഹീന്‍ രോഹിത്തിനെ ബൗള്‍ഡാക്കിയത്. വണ്‍ ഡൗണായി എത്തിയ കോലി നസീം ഷായ്‌ക്കെതിരെ കവര്‍ െ്രെഡവടിച്ചുകൊണ്ട് തുടങ്ങിയെങ്കിലും അടുത്ത ഓവറില്‍ തന്നെ ബൗള്‍ഡായിരുന്നു.മത്സരത്തില്‍ 10 ഓവറില്‍ 35 റണ്‍സ് മാത്രം വഴങ്ങിയാണ് അഫ്രീദി 4 വിക്കറ്റുകള്‍ സ്വന്തമാക്കിയത്.