നമീബിയയോ അഫ്ഗാനിസ്ഥാനോ ന്യൂസിലന്‍ഡിനെ തോല്‍പ്പിക്കാതെ ഇന്ത്യക്ക് വഴിയില്ല ! ഇനിയെല്ലാം ജീവന്‍മരണ പോരാട്ടങ്ങള്‍

ടി 20 ലോകകപ്പില്‍ സെമി ഫൈനല്‍ സാധ്യത നിലനിര്‍ത്തിയ ഇന്ത്യക്ക് കാര്യങ്ങള്‍ അത്ര എളുപ്പമല്ല. നമീബിയയും സ്‌കോട്ട്‌ലന്‍ഡുമാണ് ഇന്ത്യക്ക് ഇനി എതിരാളികള്‍. ഈ രണ്ട് മത്സരങ്ങളെയും ഇന്ത്യ പേടിക്കുന്നില്ല. മികച്ച മാര്‍ജിനില്‍ ഈ രണ്ട് കളികളും ജയിക്കാന്‍ ആവശ്യമായ ഒരുക്കങ്ങള്‍ ഇന്ത്യന്‍ ക്യാംപില്‍ നടക്കുന്നുണ്ട്. എന്നാല്‍, നമീബിയക്കെതിരെയും സ്‌കോട്ട്‌ലന്‍ഡിനെതിരെയും ജയിച്ചാലും ഇന്ത്യക്ക് സെമിയിലെത്താന്‍ പറ്റില്ല. ഇന്ത്യ സെമിയില്‍ എത്തണമെങ്കില്‍ അഫ്ഗാനിസ്ഥാനോ നമീബിയയോ ന്യൂസിലന്‍ഡിനെ തോല്‍പ്പിക്കണം. രണ്ട് മത്സരങ്ങള്‍ കൂടിയാണ് ന്യൂസിലന്‍ഡിന് ശേഷിക്കുന്നത്. ഇതില്‍ ഒരു കളിയില്‍ ന്യൂസിലന്‍ഡ് തോല്‍ക്കുകയും ജയിക്കുന്ന കളിയില്‍ നെറ്റ് റണ്‍റേറ്റ് വലിയ രീതിയില്‍ ഉയരാതിരിക്കുകയും വേണം. എങ്കില്‍ മാത്രമേ സ്‌കോട്ട്‌ലന്‍ഡിനോടും നമീബിയയോടും വലിയ മാര്‍ജിനില്‍ ജയിച്ചാല്‍ ഇന്ത്യക്ക് എന്തെങ്കിലും പ്രയോജനമുള്ളൂ. 

ഗ്രൂപ്പ് രണ്ടിലെ ഓരോ മത്സരങ്ങളും ഇനി നിര്‍ണായകമാണ്. ഇന്ത്യയുടെ ഭാവിയെ ബാധിക്കുന്ന മത്സരങ്ങളാണ് ഓരോന്നും. പോയിന്റ് പട്ടികയില്‍ നാല് കളികളില്‍ നാലിലും ജയം സ്വന്തമാക്കി പാക്കിസ്ഥാന്‍ ഒന്നാമതുണ്ട്. ഗ്രൂപ്പില്‍ രണ്ടില്‍ നിന്ന് പാക്കിസ്ഥാന്‍ സെമി ഫൈനല്‍ ഉറപ്പിച്ചു. നാല് കളികളില്‍ രണ്ട് ജയവുമായി അഫ്ഗാനിസ്ഥാന്‍ ആണ് രണ്ടാമത്. മൂന്ന് കളികളില്‍ രണ്ട് ജയവുമായി ന്യൂസിലന്‍ഡ് മൂന്നാമതാണ്. അഫ്ഗാനിസ്ഥാന്റെ നെറ്റ് റണ്‍റേറ്റ് +1.481 ആണ്. അഫ്ഗാനിസ്ഥാന്റെ ഉയര്‍ന്ന നെറ്റ് റണ്‍റേറ്റ് ന്യൂസിലന്‍ഡിനും ഇന്ത്യക്കും ഭീഷണിയാകും. മൂന്ന് കളികളില്‍ ഒരു ജയം മാത്രമുള്ള ഇന്ത്യ നിലവില്‍ നാലാം സ്ഥാനത്താണ്.