ആത്മവിശ്വാസവുമായി ഇന്ത്യ, ഓസീസിനെതിരായ ടി20 പോരാട്ടങ്ങൾക്ക് ഇന്ന് തുടക്കം

കാൻബറ: ഇന്ത്യയുടെ ഓസീസ് പരമ്പരയിലെ ടി20 മത്സരങ്ങൾക്ക് ഇന്ന് തുടക്കം. അവസാന ഏകദിന മത്സരം നടന്ന കാൻബറയിൽ ഇന്ന് ഉച്ചയ്‌ക്ക് 1:30നാണ് മത്സരം.

ഏകദിന പരമ്പര നഷ്ടപ്പെട്ട ഇന്ത്യക്ക് ടെസ്റ്റ് പരമ്പരയ്‌ക്ക് മുൻപ് ആത്മവിശ്വാസം തിരിച്ചുപിടിക്കാൻ ടി20 പരമ്പര വിജയം നിർണായകമാകും. ഓസീസിനെതിരെ ആദ്യ രണ്ട് ഏകദിനമത്സരങ്ങളിൽ കനത്ത പരാജയം ഏറ്റുവാങ്ങിയ ഇന്ത്യ അവസാന ഏകദിനത്തിൽ കഷ്ടിച്ച് ജയിച്ചുകയറുകയായിരുന്നു.

അതേസമയം ഇന്ന് നടക്കുന്ന ഏകദിനത്തിൽ മലയാളി താരം സഞ്ജു സാംസൺ കളിക്കുമോ എന്ന ആകാംക്ഷയിലാണ് മലയാളികൾ. സ്പെഷ്യലിസ്റ്റ് ബാറ്റ്സ്മാനായാണ് സഞ്ജുവിനെ ടീമിൽ ഉൾപ്പെടുത്തിയിരിക്കുന്നത്. അതേസമയം മൂന്നാം ഏകദിനത്തിൽ ഇന്ത്യക്കായി തിളങ്ങിയ നടരാജൻ ആദ്യ ഇലവനിൽ ഇടം പിടിച്ചേക്കും.

ഏകദിന പരമ്പരയിൽ മികച്ച ഫോമിലായിരുന്ന മാക്‌സ്‌വെല്ലാകും ടി20യിൽ ഇന്ത്യയുടെ പ്രധാന വെല്ലുവിളി. ഐപിഎല്ലിൽ നിറം മങ്ങിയെങ്കിലും ഓസീസ് ജേഴ്‌സിയിൽ മികച്ച പ്രകടനമാണ് താരം കാഴ്‌ച്ച വെക്കുന്നത്.