കോലി മഹാനായ ക്രിക്കറ്റ് താരം, ഇന്ത്യൻ നായകനെ പ്രശംസകൊണ്ട് മൂടി സ്റ്റീവ് സ്മിത്

വിരാട് കോലിയാണോ സ്റ്റീവ് സ്മിത്താണോ നിലവിലെ ഏറ്റവും മികച്ച ക്രിക്കറ്റ് താരമെന്ന ചർച്ച ആരാധകർക്കിടയിൽ വളരെ രൂക്ഷമാണെങ്കിലും മൈതാനത്തിന് പുറത്ത് ഇരു താരങ്ങളും തന്നെ നല്ല സുഹൃത്തുക്കളാണ്. ഇത് ശരി വെക്കുന്ന തരത്തിൽ ഇന്ത്യൻ നായകനെ പ്രശംസിച്ചുകൊണ്ട് രംഗത്ത് വന്നിരിക്കുകയാണ് സ്റ്റീവ് സ്മിത്ത് ഇപ്പോൾ.

കോലി മഹാനായ ക്രിക്കറ്റ് താരമാണെന്നാണ് സ്മിത്ത് അഭിപ്രായപ്പെട്ടത്. അദ്ദേഹത്തിന്റെ റൺസുകൾ തന്നെ കോലി എന്താണെന്ന് സംസാരിക്കും. ഇതിനോടകം അനവധി റെക്കോഡുകൾ സ്വന്തമാക്കിയ താരമാണദ്ദേഹം. ഇനിയും നിരവധി റെക്കോഡുകൾ അദ്ദേഹം തകർക്കും. റൺസുകൾക്ക് വേണ്ടി ദാഹിക്കുന്ന ഒരാളാണ് അദ്ദേഹം. അയാളെ തടയുക എളുപ്പമല്ല. എന്നാൽ ഓസീസിനെതിരെ കളിക്കുമ്പോൾ കോലിയെ തളക്കാനാവുമെന്നാണ് പ്രതീക്ഷ. നായകനെന്ന നിലയിൽ ഇന്ത്യയെ ടെസ്റ്റിലെ ഒന്നാം നമ്പർ താരമാക്കി മാറ്റിയത് അദ്ദേഹമാണ്.ഫിറ്റ്‌നസ് കാത്ത് സൂക്ഷിക്കുന്നതില്‍ കോലി എല്ലാവർക്കും മാതൃകയാണെന്നും സ്മിത്ത് പറഞ്ഞു.

2019ലെ ലോകകപ്പിനിടയിൽ കാണികൾക്കിടയിൽ നിന്ന് പരിഹാസം നേരിടേണ്ടിവന്നപ്പോൾ കോലി നൽകിയ പിന്തുണ വളരെ വലുതാണെന്നും അതിനെ അഭിനന്ദിക്കുന്നതായും സ്മിത്ത് കൂട്ടിച്ചേർത്തു.