Virat Kohli: രഞ്ജി ട്രോഫിക്കുള്ള ഡല്‍ഹിയുടെ സാധ്യത സ്‌ക്വാഡില്‍ വിരാട് കോലിയും

ഡല്‍ഹിക്കു വേണ്ടി കോലി കളിക്കുകയാണെങ്കില്‍ 2012/13 സീസണു ശേഷം താരത്തിന്റെ രഞ്ജിയിലേക്കുള്ള തിരിച്ചുവരവ് ആയിരിക്കും അത്

Virat Kohli: 2024-25 സീസണിലെ രഞ്ജി ട്രോഫിക്കുള്ള ഡല്‍ഹി ടീമിന്റെ സാധ്യത സ്‌ക്വാഡില്‍ ഇന്ത്യന്‍ താരം വിരാട് കോലിയും. ഡല്‍ഹി ആന്‍ഡ് ഡിസ്ട്രിക്ട് ക്രിക്കറ്റ് അസോസിയേഷന്‍ ഇന്നലെ ചേര്‍ന്ന യോഗത്തിനു ശേഷമാണ് സാധ്യത താരങ്ങളുടെ പട്ടിക പുറത്തുവിട്ടത്. ഇന്ത്യന്‍ വിക്കറ്റ് കീപ്പര്‍ ബാറ്റര്‍ റിഷഭ് പന്തും സാധ്യത പട്ടികയില്‍ ഇടം പിടിച്ചിട്ടുണ്ട്. 

ഡല്‍ഹിക്കു വേണ്ടി കോലി കളിക്കുകയാണെങ്കില്‍ 2012/13 സീസണു ശേഷം താരത്തിന്റെ രഞ്ജിയിലേക്കുള്ള തിരിച്ചുവരവ് ആയിരിക്കും അത്. 2019 ലാണ് രഞ്ജി ട്രോഫിക്കുള്ള ഡല്‍ഹിയുടെ സാധ്യത പട്ടികയില്‍ കോലി അവസാനമായി ഇടംപിടിച്ചത്. എന്നാല്‍ അന്ന് കളിക്കാന്‍ സാധിച്ചിട്ടില്ല. 

സാധ്യത പട്ടികയില്‍ 84 താരങ്ങളാണ് ഉള്ളത്. സെപ്റ്റംബര്‍ 26 ന് (നാളെ) ഫിറ്റ്‌നെസ് ടെസ്റ്റ് നടക്കും. അതിനുശേഷമായിരിക്കും ടീം പ്രഖ്യാപനം. ന്യൂസിലന്‍ഡിനെതിരായ ടെസ്റ്റ് പരമ്പര വരാനിരിക്കുന്നതിനാല്‍ രഞ്ജി ട്രോഫിയില്‍ കോലിയും പന്തും കളിക്കുമോ എന്ന കാര്യം സംശയമാണ്. ഒക്ടോബര്‍ 11 നാണ് രഞ്ജി ട്രോഫി ആരംഭിക്കുക. ഒക്ടോബര്‍ 16 ന് ന്യൂസിലന്‍ഡിനെതിരായ ഇന്ത്യയുടെ ടെസ്റ്റ് പരമ്പരയ്ക്കു തുടക്കമാകും.