ഐസിസി ടെസ്റ്റ് റാങ്കിംഗ്: ഒന്നാം സ്ഥാനം വിട്ടുകൊടുക്കാതെ ജഡേജ, കുതിച്ചു കയറി ധവാന്‍

ബൗളര്‍മാരുടെ പട്ടികയില്‍ ഇന്ത്യന്‍ മുന്നേറ്റം

ഐസിസി ടെസ്റ്റ് ക്രിക്കറ്റ് റാങ്കിങ്ങില്‍ ബൗളര്‍മാരുടെ പട്ടികയിലെ ഒന്നാം സ്ഥാനം വിട്ടുകൊടുക്കാതെ ഇന്ത്യന്‍ ഓള്‍ റൗണ്ടര്‍ രവീന്ദ്ര ജഡേജ. ശ്രീലങ്കയ്‌ക്കെതിരായ ആദ്യ ടെസ്റ്റിലെ നാലു വിക്കറ്റ് പ്രകടനത്തോടെ ലങ്കയുടെ രംഗന ഹെറാത്തിനെ പിന്തള്ളി മൂന്നാം സ്ഥാനത്തുണ്ടായിരുന്ന രവിചന്ദ്ര അശ്വിന്‍ പട്ടികയില്‍ രണ്ടാം സ്ഥാനത്തെത്തുകയും ചെയ്തു.   

ജഡേജ 897 പോയിന്റ് നേടിയപ്പോള്‍, അശ്വിന്‍ 849 പോയിന്റുകള്‍ സ്വന്തമാക്കി. അതേസമയം, ബാറ്റ്‌സ്മാന്‍മാരുടെ പട്ടികയില്‍ ചേതേശ്വര്‍ പുജാര നാലാം സ്ഥാനത്തും ഇന്ത്യന്‍ നായകന്‍ വിരാട് കോഹ്‌ലി അഞ്ചാം സ്ഥാനത്തും ഇടം പിടിച്ചു. ആസ്‌ത്രേലിയന്‍ ക്യാപ്റ്റന്‍ സ്റ്റീവ് സ്മിത്താണ് ഈ പട്ടികയില്‍ ഒന്നാമത്. ഇംഗ്ലണ്ടിന്റെ ജോ റൂട്ട്, ന്യൂസിലന്‍ഡിന്റെ കെയ്ന്‍ വില്യംസണ്‍ എന്നിവരാണ് രണ്ടും മൂന്നും സ്ഥാനങ്ങളിലുള്ളത്‍.

ലങ്കയ്‌ക്കെതിരായ ആദ്യ ടെസ്റ്റിലെ സെഞ്ച്വറി പ്രകടനത്തിലൂടെ, ഓപ്പണര്‍ ശിഖര്‍ ധവാന്‍ റാങ്കിംഗില്‍ വന്‍ കുതിപ്പ് നടത്തി. 21 പോയിന്റ് മെച്ചപ്പെടുത്തിയ ധവാന്‍ 39 ആം സ്ഥാനത്താണ് ഇപ്പോള്‍. ഓള്‍റൗണ്ടര്‍മാരുടെപട്ടികയില്‍ ബംഗ്ലാദേശിന്റെ ഷാക്കിബ് അല്‍ ഹസ്സനാണ് ഒന്നാമത്. രവീന്ദ്ര ജഡേജ, അശ്വിന്‍ എന്നിവരാണ് ഈ പട്ടികയില്‍ രണ്ടും മൂന്നും സ്ഥാനങ്ങളില്‍ ഇടം നേടിയിട്ടുള്ളത്.