ഗ്രേറ്റ്ഫാദര്‍ മലയാളത്തിന്‍റെ ബാഹുബലി, യഥാര്‍ത്ഥ ബാഹുബലി ടീം വിയര്‍ക്കുന്നു!

കളക്ഷന്‍റെ കാര്യത്തില്‍ മലയാളത്തിന്‍റെ ബാഹുബലിയാണ് മമ്മൂട്ടിയുടെ ദി ഗ്രേറ്റ്ഫാദര്‍. 60 കോടി കളക്ഷനുമായി കുതിക്കുന്ന സിനിമ ഇപ്പോഴും കേരളത്തിലെ എല്ലാ സെന്‍ററുകളിലെയും ഏറ്റവും പ്രധാന ആകര്‍ഷണമാണ്. തിയേറ്ററുകള്‍ പൂരപ്പറമ്പാക്കുന്ന ജനത്തിരക്കാണ് ഇപ്പോഴും ഗ്രേറ്റ്ഫാദറിന്.

ഈ യാഥാര്‍ത്ഥ്യങ്ങള്‍ മനസിലാക്കി ബാഹുബലി 2ന്‍റെ അണിയറപ്രവര്‍ത്തകര്‍ കൊണ്ടുപിടിച്ച പ്രമോഷനാണ് നടത്തുന്നത്. 28നാണ് ബാഹുബലി 2 റിലീസാകുന്നത്. ഗ്രേറ്റ്ഫാദര്‍ ഇഫക്ടില്‍ ബാഹുബലിക്ക് സംഭവിച്ചേക്കാവുന്ന കളക്ഷന്‍ ഇടിവ് മറികടക്കാനുള്ള എല്ലാ നീക്കങ്ങളും രാജമൌലിയും ടീമും നടത്തുന്നുണ്ട്.

ബാഹുബലി ടീം കേരളത്തില്‍ സന്ദര്‍ശനത്തിനെത്തിയത് അതിന്‍റെ ഭാഗമായാണ്. പ്രഭാസും റാണയും അനുഷ്കയും ഉള്‍പ്പടെയുള്ള താരങ്ങള്‍ കേരളത്തിലെത്തി ബാഹുബലി 2ലേക്ക് ഏവരുടെയും ശ്രദ്ധയാകര്‍ഷിക്കാനുള്ള ശ്രമത്തിലാണ്.

അതേസമയം, 60 കോടിയിലേറെ കളക്ഷനുമായി ഗ്രേറ്റ്ഫാദര്‍ കുതിപ്പ് തുടരുകയാണ്. ഗള്‍ഫ് ഏരിയയിലും യൂറോപ്യന്‍ രാജ്യങ്ങളിലും ഗ്രേറ്റ്ഫാദര്‍ മെഗാഹിറ്റാണ്.