ദിലീപ് അല്ല, ഒടുവില്‍ ആ പ്രമുഖ നടന്‍ പുതുമുഖതാരം?!

പ്രമുഖ നടനെ പ്രതിക്കൂട്ടില്‍ നിര്‍ത്തുമെന്ന് ഉറപ്പിക്കാം!

കേരളക്കരയെ പിടിച്ചുലച്ച കേസാണ് നടി ആക്രമിക്കപ്പെട്ട സംഭവം. മലയാള സിനിമയില്‍ ഇന്നേ വരെ സംഭവിക്കാത്ത കാര്യങ്ങളായിരുന്നു ഫെബ്രുവരി മുതല്‍ നടന്നു കൊണ്ടിരിക്കുന്നത്. ഇപ്പോഴും അവസാനിച്ചിട്ടില്ലാത്ത ഈ കേസിന്റെ ക്ലൈമാക്സ് എന്നുണ്ടാകുമെന്ന കാര്യത്തില്‍ കേരള പൊലീസിന് പോലും ഉറപ്പില്ലെന്ന വേണം കരുതാന്‍. 

അതേസമയം, കേസിലെ ഗൂഡാ‍ലോചന പൊലീസ് തെളിയിച്ചാലും ഇല്ലെങ്കിലും ആ ‘പ്രമുഖ നടനെ’ ബൈജു കൊട്ടാരക്കര നമുക്ക് കാണിച്ച് തരും. നടിക്കെതിരായ ആക്രമണം ബൈജു കൊട്ടരക്കര സിനിമയാക്കാന്‍ ഒരുങ്ങുന്നുവെന്ന് റിപ്പോര്‍ട്ടുകള്‍ വന്നിരുന്നു. ‘പ്രമുഖ നടന്‍’ എന്ന് പേരിട്ട ചിത്രത്തില്‍ പുതുമുഖ താരമാണ് നായകനായി എത്തുക. നിലവിലെ സാഹചര്യത്തില്‍ മുന്‍ നിര താരങ്ങള്‍ ആരും തന്നെ തയ്യാറാകാത്തതിനെ തുടര്‍ന്നാണ് പുതുമുഖത്തെ നായകനാക്കാന്‍ സംവിധായകന്‍ തീരുമാനിച്ചത്. 

നേരത്തേ, കേസുമായി ബന്ധപ്പെട്ട് ആരോപണ വിധേയനായ നടന്‍ ദിലീപ് ചിത്രത്തില്‍ അഭിനയിക്കുമോ എന്നൊരു ചോദ്യവും സോഷ്യല്‍ മീഡിയയില്‍ നിന്നും ഉയര്‍ന്നിരുന്നു. എന്നാല്‍, ആ റിപ്പോര്‍ട്ടുകള്‍ ഒന്നും സത്യമല്ലെന്ന് ഇപ്പോള്‍ വ്യക്തമാകുന്നു. ചിത്രത്തിന്റെ അണിയറ പ്രവര്‍ത്തനങ്ങള്‍ ആരംഭിച്ചു കഴിഞ്ഞു. 

ക്രൈം ത്രില്ലറായിട്ടായിരിക്കം ചിത്രം പ്രേക്ഷകരിലെത്തിക്കുക. പോലീസ് സേനയിലെ ഉന്നതരുടെ പേരും സിനിമ ലോകത്തെ പങ്കാളികളുടെ പേരും ലൈംഗീക ചൂഷണങ്ങളും, പ്രമേയമാകുന്ന ചിത്രം വന്‍ വിവാദങ്ങള്‍ക്ക് വഴിവയ്ക്കുമെന്ന് കാര്യത്തില്‍ സംശയമില്ല. 

നടി ആക്രമിക്കപ്പെട്ട വിഷയത്തിലെ സത്യം അറിയാന്‍ ആഗ്രഹിക്കുന്ന മലയാളി പ്രേക്ഷകര്‍ ചിത്രത്തെ ഇരുകൈയും നീട്ടി സ്വീകരിക്കുമെന്ന പ്രതീക്ഷയിലാണ് ബൈജു കൊട്ടാരക്കര. നടി ആക്രമിക്കപ്പെട്ട സംഭവത്തില്‍ ദിലീപിനെ അനുകൂലിച്ച് സംസാരിച്ച സലിം കുമാറിനെ ബൈജു കൊട്ടാരക്കര പരിഹസിച്ചിരുന്നു.