ബാഹുബലിക്ക് എന്ത് ദാമ്പത്യത്തകര്‍ച്ച? മുന്‍‌ഭാര്യയെയും കൂട്ടി സൂപ്പര്‍സ്റ്റാര്‍ പടം കാണാനെത്തി!

ബാഹുബലി 2 ഇന്ത്യന്‍ സിനിമയിലെ അത്ഭുതസൃഷ്ടിയായി മാറിക്കഴിഞ്ഞു. കളക്ഷന്‍ 1000 കോടി പിന്നിട്ട് ചിത്രം മുന്നേറുമ്പോള്‍ വിദേശരാജ്യങ്ങളിലും ഈ സിനിമ റെക്കോര്‍ഡുകള്‍ തകര്‍ക്കുന്ന കാഴ്ചയാണ് കാണുന്നത്. അമേരിക്കയിലും യു കെയിലും ചിത്രം ബമ്പര്‍ ഹിറ്റാണ്. ഹോളിവുഡ് സിനിമകളെ പോലും വെല്ലുന്ന കളക്ഷനാണ് വിദേശത്ത് ബാഹുബലി 2 സ്വന്തമാക്കുന്നത്.

ബാഹുബലി 2 തിയേറ്ററില്‍ പ്രേക്ഷകര്‍ ഇടിച്ചുകയറി കാണുമ്പോള്‍ സെലിബ്രിറ്റികളും ഒട്ടും പിന്നിലല്ല. സിനിമാലോകത്തെ എല്ലാവരും ചിത്രം എത്രയും വേഗം കാണുന്ന തിരക്കിലാണ്. ബാഹുബലി എന്ന കഥാപാത്രത്തെ അവതരിപ്പിക്കാന്‍ രാജമൌലി ആദ്യം മനസില്‍ ആലോചിച്ചത് ബോളിവുഡ് സൂപ്പര്‍താരം ഹൃത്വിക് റോഷനെയായിരുന്നു. ഹൃത്വിക്കും കഴിഞ്ഞ ദിവസം ബാഹുബലി 2 തിയേറ്ററിലെത്തി കണ്ടു.

എന്നാല്‍ ഹൃത്വിക് റോഷനൊപ്പം സിനിമ കാണാനെത്തിയ ആളെ കണ്ടാണ് ഏവരും അമ്പരന്നത്. അദ്ദേഹത്തിന്‍റെ മുന്‍ ഭാര്യ സുസൈന്‍ ഖാനാണ് ബാഹുബലി 2 കാണാന്‍ ഒപ്പം വന്നത്. ഹൃത്വിക്കിന്‍റെയും സുസൈന്‍റെയും മക്കളായ രെഹാനും റിദാനും ഇവര്‍ക്കൊപ്പമുണ്ടായിരുന്നു.

ദാമ്പത്യം വേര്‍പിരിഞ്ഞെങ്കിലും ഹൃത്വിക്കും സുസൈനും ഇപ്പോഴും നല്ല കൂട്ടുകാരാണ്. ബാഹുബലി 2 മക്കള്‍ക്കൊപ്പം ഒരുമിച്ചുകാണാമെന്ന് അവര്‍ തീരുമാനിക്കുകയായിരുന്നു.