6000 വിവാഹാലോചനകൾ പ്രഭാസ് വേണ്ടെന്ന് വെച്ചത് അനുഷ്കയ്ക്ക് വേണ്ടി?

ദേവസേനയും ബാഹുബലിയും ജീവിതത്തിലും ഒന്നിക്കുന്നു?!

ബാഹുബലിയുടെ രണ്ടാംഭാഗവും ഹിറ്റായതോടെ പ്രധാന കഥാപാത്രങ്ങളെ അവതരിപ്പിച്ച പ്രഭാസും അനുഷ്കയും ഗോസിപ്പ് കോളങ്ങളിൽ നിറഞ്ഞു. ഇരുവരും പ്രേമത്തിലാണെന്ന് നേരത്തേ റിപ്പോർട്ടുകൾ ഉണ്ടായിരുന്നു. ഇപ്പോഴിതാ പാപ്പരാസികളെ ശരിവച്ച് പ്രഭാസും അനുഷ്‌ക ഷെട്ടിയും വിവാഹിതരാകുന്നുവെന്നാണ് തെലുങ്കിൽ നിന്നും വരുന്ന റിപ്പോർട്ടുകൾ.

കഥാപാത്രങ്ങള്‍ക്ക് വേണ്ടി സൗന്ദര്യം പോലും പ്രശ്‌നമാക്കാതെ എന്തു ത്യാഗം സഹിക്കുന്നവരാണ് ഇരുവരും. ബാഹുബലിയിലൂടെ എല്ലാവര്‍ക്കും പ്രിയങ്കരനായി തീര്‍ന്ന താരമാണ് പ്രഭാസ്. ചിത്രത്തിന്റെ രണ്ടാം ഭാഗത്തിനുവേണ്ടി 100 കിലോ ഭാരം വരെ താരം കൂട്ടിയിരുന്നു. അനുഷ്‌കയാകയാകട്ടേ സൈസ് സീറോ എന്ന ചിത്രത്തിനുവേണ്ടി അമിതമായി ഭാരം വര്‍ധിപ്പിച്ചിരുന്നു.

ബാഹുബലി, മിര്‍ച്ചി എന്നീ ചിത്രങ്ങളില്‍ പ്രഭാസും അനുഷ്‌കയും ഒരുമിച്ച് അഭിനയിച്ചിരുന്നു. ബാഹുബലിയിൽ അഭിനയിക്കുന്ന സമയത്ത് പ്രഭാസിന് 6000 വിവാഹാലോചനകള്‍ വന്നിരുന്നു. അതൊക്കേയും പ്രഭാസ് തള്ളിക്കളയുകയാണ് ചെയ്തത്. അതിനൊന്നും പ്രഭാസ് കുലുങ്ങാതിരുന്നതിനു പിന്നില്‍ സുന്ദരിയായ അനുഷ്കയാണ് കാരണമെന്നാണ് സിനിമാ ലോകം കണ്ടെത്തിയിരിക്കുന്നത്.

മനസില്‍ അനുഷ്കയുള്ളപ്പോള്‍ ആറായിരമല്ല വിവാഹാലോചനകള്‍ എത്രതന്നെ വന്നാലും പ്രഭാസ് എങ്ങനെ വകവെയ്ക്കുമെന്നാണ് പാപ്പരാസികൾ ചോദിക്കുന്നത്. പ്രഭാസും അനുഷ്കയും തമ്മില്‍ കടുത്ത പ്രണയത്തിലാണെന്നാണ് സിനിമാലോകത്തുനിന്നുള്ള വാര്‍ത്ത. അധികം വൈകാതെ തന്നെ ഇരുവരും തമ്മിലുള്ള വിവാഹം നടക്കുമെന്ന പ്രതീക്ഷയിലാണ് ആരാധകരും.