കീർത്തി, നിന്റെ വികൃതമായ ചിരി ഞാൻ മറക്കില്ല: ശ്രീ റെഡ്ഡി

ലൈംഗികാരോപണം; കീർത്തി സുരേഷിനെതിരെ ശ്രീ റെഡ്ഡി

നടി കീർത്തി സുരേഷിനെതിരെ തെലുങ്ക് താരം ശ്രീറെഡ്ഡി. കീർത്തിയും വിശാലും ഒരുമിച്ച സണ്ടക്കോഴി 2 വിന്റെ പ്രസ്മീറ്റിൽ പങ്കെടുക്കവേ ശ്രീറെഡ്ഡിയെക്കുറിച്ച് വിശാല്‍ പറഞ്ഞത് കേട്ട് കീര്‍ത്തി ചിരിച്ചതാണ് നടിയെ ചൊടിപ്പിച്ചത്.   

നേരത്തെ നാനിക്കെതിരേ ലൈംഗികാരോപണം ഉന്നയിച്ച ശ്രീറെഡ്ഡിക്കെതിരേ വിശാല്‍ രംഗത്ത് വന്നിരുന്നു. ഇതിനെ കുറിച്ചുള്ള പ്രതികരണം ആരാഞ്ഞ മാധ്യമ പ്രവർത്തകർക്ക് വിശാൽ നൽകിയ മറുപടിയാണ് കീർത്തിയടക്കമുള്ളവരെ ചിരിപ്പിച്ചത്.

ശ്രീറെഡ്ഡിയെ പരിഹസിച്ചായിരുന്നു വിശാലിന്റെ മറുപടി. ‘ഇത്രയും വിവാദങ്ങൾ നടക്കുന്ന സമയത്തും അവർക്ക് പുതിയ ചിത്രങ്ങളില്‍ അഭിനയിക്കാന്‍ അവസരം ലഭിക്കുകയാണെങ്കില്‍ അത് നല്ല കാര്യമാണ്. ആരാണോ ആ ചിത്രത്തില്‍ അവരോടൊപ്പം അഭിനയിക്കുന്നത് അവര്‍ വളരെയേറെ ശ്രദ്ധിക്കണം. ശ്രീ റെഡ്ഡിയിൽ നിന്നും രക്ഷപെടാൻ എപ്പോഴും ഒരു ക്യാമറ വെയ്ക്കുന്നത് നല്ലതായിരിക്കും’- എന്നായിരുന്നു വിശാലിന്റെ മറുപടി.

കീര്‍ത്തിയുള്‍പ്പടെയുള്ളവര്‍ ചിരിച്ചുകൊണ്ടാണ് വിശാലിന്റെ മറുപടി കേട്ടത്. ഇതാണ്  ശ്രീറെഡ്ഡിയെ ചൊടിപ്പിച്ചത്. ‘എന്നെക്കുറിച്ച് വിശാല്‍ പറയുന്നത് കേട്ടുള്ള കീര്‍ത്തി സുരേഷിന്റെ ചിരി വികൃതമായിരുന്നു. വിഷമിക്കേണ്ട മാഡം നിങ്ങള്‍ എന്നും നല്ല നിലയില്‍ ആകണമെന്നില്ല. ഒരുദിവസം നിങ്ങള്‍ക്ക് പോരാടുന്നവന്റെ വിഷമം മനസിലാകും. ഞാന്‍ ഒരിക്കലും നിങ്ങളുടെ ചിരി മറക്കില്ല.‘- ശ്രീറെഡ്ഡി കുറിച്ചു

പ്രമുഖര്‍ക്കെതിരേയുള്ള ലൈംഗികാരോപണങ്ങളും പ്രസ്താവനകളും കൊണ്ട് തെന്നിന്ത്യന്‍ സിനിമാ ലോകത്തെ പിടിച്ചു കുലുക്കിയ താരമാണ് ശ്രീറെഡ്ഡി. നടന്മാരായ നാനി, ലോറന്‍സ്, ശ്രീകാന്ത്, സംവിധായകരായ മുരുഗദോസ്, സുന്ദര്‍ സി തുടങ്ങിയവര്‍ക്കെതിരേയുള്ള ശ്രീറെഡ്ഡിയുടെ ലൈംഗികാരോപണങ്ങള്‍ വലിയ വിവാദങ്ങള്‍ക്കാണ് വഴിവെച്ചത്.