ഇന്ത്യകണ്ട എക്കാലത്തെയും മികച്ച ഫുട്ബോള്‍ കളിക്കാരിലൊരാളാണ് വിപി സത്യൻ. അദ്ദേഹത്തിന്റെ ജീവിതകഥ പറയുന്ന ചിത്രമാണ് ‘ക്യാപ്റ്റന്‍’. ജയസൂര്യ നായകനാകുന്ന ചിത്രം ഇന്ന് തിയേറ്ററുകളിൽ എത്തും. അതിനിടയിൽ ചിത്രത്തിന്റെ പുതിയ ടീസർ പുറത്തിറങ്ങി.
ഇപ്പോള്‍ പുറത്തുവന്ന പുതിയ ടീസറില്‍ അഡാറ് ഡയലോഗുമായി കളം നിറയുന്നത് മലയാളത്തിന്റെ മെഗാതാരം മമ്മൂട്ടിയാണ്. “തോറ്റവരാണെന്നും ചരിത്രം ഉണ്ടാക്കിയിട്ടുള്ളത്. ജയിച്ചവര്‍ ചരിത്രത്തിന്റെ ഭാഗമായി മാറിനിന്നിട്ടേ ഉള്ളു. വരും ഇന്ത്യന്‍ ഫുട്‌ബോളിനൊരു നല്ല കാലം വരും സത്യാ..അന്ന് നിങ്ങളെ ലോകം അംഗീകരിക്കും…”ടീസറിലെ മമ്മൂട്ടിയുടെ ഇടിവെട്ട് ഡയലോഗ് ഇങ്ങനെയാണ്. ഏതായാലും ടീസർ പ്രേക്ഷകർ സ്വീകരിച്ച് കഴിഞ്ഞു.
ക്യാപ്റ്റന്‍ റിലീസ് ചെയ്യുമ്പോള്‍ ഫുട്ബോള്‍ ആരാധകരോടൊപ്പം മമ്മൂട്ടി ആരാധകരും സന്തോഷത്തിലാണ്. മമ്മൂട്ടിയും സത്യനും യഥാര്‍ത്ഥ ജീവിതത്തില്‍ കണ്ടുമുട്ടിയ നിമിഷം അതുപോലെ തന്നെ സിനിമയിലുംഉണ്ടാകും. പ്രജേഷ് സെന്നാണ് ചിത്രം സംവിധാനം ചെയ്യുന്നത്. ഗുഡ് വില്‍ എന്റര്‍ടെയ്ന്‍മെന്റിന്റെ ബാനറില്‍ ടിഎല്‍ ജോര്‍ജ്ജാണ് ക്യാപ്റ്റന്‍ നിര്‍മ്മിക്കുന്നത്.