കുഞ്ഞാലി മരക്കാര്‍ കൊണ്ടുപോയതിന് മധുരപ്രതികാരം, മോഹന്‍ലാലിന്‍റെ ‘കൂടത്തായി’ വെട്ടി മമ്മൂട്ടി!

കുഞ്ഞാലി മരക്കാര്‍ എന്ന പ്രൊജക്ട് മോഹന്‍ലാല്‍ ക്യാമ്പ് കൊണ്ടുപോയത് വലിയ തിരിച്ചടിയായിരുന്നു മമ്മൂട്ടിക്ക്. ആദ്യം പ്രൊജക്ട് പ്രഖ്യാപിച്ച മമ്മൂട്ടി ക്യാമ്പിനെ അമ്പരപ്പിച്ചുകൊണ്ടുള്ള ഒരു നീക്കമായിരുന്നു പ്രിയദര്‍ശനും മോഹന്‍ലാലും ചേര്‍ന്ന് നടത്തിയത്. മമ്മൂട്ടിയെ നായകനാക്കി കുഞ്ഞാലി മരക്കാര്‍ ചെയ്യുമെന്ന് നിര്‍മ്മാതാവ് ഷാജി നടേശന്‍ വ്യക്തമാക്കിയിട്ടുണ്ടെങ്കിലും ആ പ്രൊജക്ട് ഇനി നടക്കാനുള്ള സാധ്യത കുറവാണ്.

എന്നാല്‍, കുഞ്ഞാലി മരക്കാര്‍ കൊണ്ടുപോയതിന് കൃത്യമായ മധുരപ്രതികാരം ചെയ്തിരിക്കുകയാണ് മമ്മൂട്ടി. കൂടത്തായി പരമ്പരക്കൊലപാതകം സിനിമയാക്കുമെന്ന് ആന്‍റണി പെരുമ്പാവൂര്‍ കഴിഞ്ഞ ദിവസം പ്രഖ്യാപിച്ചിരുന്നു. അന്വേഷണ ഉദ്യോഗസ്ഥനായി മോഹന്‍ലാല്‍ എത്തും എന്നായിരുന്നു അറിയിച്ചത്. എന്നാല്‍ അതിന് മുമ്പ്, കൂടത്തായി കൊലപാതകം സിനിമയാക്കാന്‍ മമ്മൂട്ടി ഒരുങ്ങുകയാണ്.

കെ മധു - എസ് എന്‍ സ്വാമി ടീമിന്‍റെ സിബിഐ സീരീസിലെ അഞ്ചാം ചിത്രം പ്രമേയമാക്കുന്നത് കൂടത്തായി കൊലപാതക പരമ്പര ആണെന്നാണ് സൂചന. സേതുരാമയ്യര്‍ ഈ കേസ് ഏറ്റെടുക്കുന്നതും അന്വേഷിച്ച് കണ്ടെത്തുന്നതുമാണ് പ്രമേയം എന്നാണ് അറിയാന്‍ കഴിയുന്നത്. അടുത്ത വര്‍ഷം ആദ്യം ചിത്രീകരണം ആരംഭിക്കും. ബാസ്‌കറ്റ് കില്ലിംഗ് എന്ന ഏറെ പ്രത്യേകതയുള്ള ഒരു കൊലപാതകരീതി എസ് എന്‍ സ്വാമി ഈ സിനിമയില്‍ അവതരിപ്പിക്കുന്നുണ്ട്.

2020 ജനുവരിയില്‍ തന്നെ ചിത്രീകരണം തുടങ്ങുമെന്നാണ് സൂചന. കൃഷ്ണകൃപയും സ്വര്‍ഗചിത്രയും ചേര്‍ന്നാണ് നിര്‍മ്മാണമെന്നാണ് റിപ്പോര്‍ട്ടുകള്‍. എന്തായാലും ഇതിന് മുമ്പ് കൂടത്തായ് കൊലക്കേസിന്‍റെ ഷൂട്ടിംഗ് തുടങ്ങാന്‍ മോഹന്‍ലാലിന് കഴിയില്ലെന്നാണ് മമ്മൂട്ടി ആരാധകരും വിശ്വസിക്കുന്നത്.